Grigels Muçollari

Dy fjalë për mburravecin deputet

Një mburravec deputet që ka refuzuar të dëgjojë prej 20 ditësh thirrjen dhe mesazhin e protestuesve e pa mbrëmë nga afër se kush janë pozitat dhe kreditet e tij në publik, teksa provokoi duke u futur mes turmës. U desh pastaj ndërhyrja e policisë para se mburraveci deputet i Edi Ramës të merrte dhe një leksion fizik.

Është për t’u dënuar akti i deputetit, i cili, me duar në xhepa, me imunitet në supe dhe me arrogancën tipike rilindase, parakaloi mes atyre që janë ngritur kundër korrupsionit dhe shpërfilljes, kundër fyerjes e poshtërimit që kjo mazhorancë bën prej 13 vitesh.

Të njëjtën shpërfillje e poshtërim tentoi dje ta bënte deputeti mburravec, jo më përmes ekranit të përnatshëm, por në mes të qytetarëve të revoltuar.

Incidenti me Bidon tregon nivelin e zemërimit të qytetarëve me qeverinë e tyre. Të njëjtin “dajak” do ta merrte çdo deputet socialist, çdo ministër. Zoti e dhëntë që këtë provokim të mos e bëjë ndonjë ditë Edi Rama, se kushedi ç’do na shihnin sytë.

Urrejtjes 13-vjeçare i është shtuar edhe injorimi 20-ditor që i është bërë lëvizjes më të madhe në dekada. Të rinjtë janë fyer, janë anatemuar, janë damkosur, janë sulmuar si armiq të Shqipërisë.

Mburraveci deputet mori atë çfarë Edi Rama, me shërbëtorët si ai, ka mbjellë në 13 vite.

Nuk është trimëri ajo e Bidos, përkundrazi. Kurajo është të bësh atë që bëri zonja Koçeku, që foli me akte të forta dhe po përballet edhe me kërcënime bandash.

Luksi i Bazelit, përgjigja e Ramës për protestën

Vajtja në një event luksi, në një prej hoteleve më të shtrenjta të Europës, në kulmin e krizës politike në vend, ku një nga arsyet kryesore të revoltës është varfëria dhe korrupsioni, është përgjigjja më kuptimplotë që Edi Rama ka dhënë deri tani ndaj protestuesve.

Ai ka reaguar e ka dhënë shpjegime, ka sulmuar, sharë e fyer, ka qenë çdo ditë i angazhuar në front me armiqtë.

Por më emblematikja, më domethënësja, ishte kjo vizitë private në Bazel, mes luksit dhe vanitetit.

Edi Rama, me këtë, u tha qindra mijëra protestuesve se nuk ia ndjen fare. Për korrupsionin, përgjigjja e tij është ndjekja e interesave private në evente ku shpesh bën plaçkë Shqipërinë. Për varfërinë, u përgjigj me hotelin më të shtrenjtë të Bazelit.

Kjo është sjellje tipike e diktatorëve të ish-republikave ruse ose e sulltanëve të Oqeanit Indian.

Shqiptarët s'duhet të kenë asnjë iluzion se çdo ditë në detyrë e Edi Ramës është një ditë më shumë korrupsion e luks për atë dhe varfëri për njerëzit.

Ndaj, sonte më shumë, nesër më shumë. Vendosmëri e forcë për largimin e autokratit vanitoz të zhytur në luks.

Aruba u vërtetua. Dhe hija e Edi Ramës është aty.

Gazetari italian Nello Trocchia, autor i një libri për mafian shqiptare, i kushton një kapitull Arubës: takimit të krerëve të narko-trafikut me eksponentë të lartë të qeverisë së Edi Ramës. Trocchia e ka marrë këtë informacion nga dosja e Antimafias italiane dhe, për shkak të punës së tij, është marrë në mbrojtje nga autoritetet italiane.

Tetë muaj më parë, në një intervistë për Syri TV, ai deklaroi se i ishte drejtuar Edi Ramës me pyetjet: a e kishte takuar ndonjëherë Artur Shehun? A kishte qenë ai vetë, ministra apo zyrtarë të lartë të qeverisë së tij në Aruba, në takim me eksponentë të lartë të krimit dhe trafikut të drogës? Përgjigje nuk pati.

U fol shumë për ishullin ekzotik në Antilet Hollandeze dhe për samitin qeveri-krim, ku dyshohej se ishte projektuar futja e parave të narko-trafikut në ekonomi, kryesisht në ndërtim. Qeveria nuk e pranoi kurrë. Propagandistët e saj u tallën.

Por dje, zyrtarisht nga SPAK, Aruba u pranua. Dosja hetimore tregon se takimi ka ndodhur.

Një konfirmim me dokumente dhe fashikuj i akuzave që prej kohësh i janë bërë Kryeministrit për skemën e futjes së parave të drogës në ekonomi, kryesisht në ndërtim.

Një mekanizëm i tillë kriminal nuk mund të vihej në jetë pa bekimin e arkitektit të tij politik, që në këtë rast është Edi Rama.

E vërteta jo vetëm doli në shesh, por në shesh ka çdo ditë thirrje kundër narko-shtetit dhe kërkohet largimi i bosit të madh.

Pikërisht një lojtar kyç i Arubës, Artur Shehu, rezulton i përfshirë edhe në investimin e Zvërnecit. Edhe kjo rastësi?

Ironi e fatit. Ishte Aruba, ishulli i ujërave kristal dhe flamingove, që për vite u paraqit si një teori konspirative. Sot, janë pikërisht ato ujëra të kthjellëta që duket se po nxjerrin në sipërfaqe atë që përpiqeshin të mbanin në fund: lidhjet e errëta mes krimit, parasë dhe pushtetit. Dhe hija e tyre duket se shtrihet deri në Zvërnec.

Po tani, a ka diçka për të thënë Edi Rama?

Ai është drejtpërdrejt përgjegjës politikisht dhe nën akuzë publike.

Në fillim e mbolli. Tani po korr Arubën.