គន់ គីម Kun Kim

ខ្ញុំ បានដឹកនាំគណៈប្រតិភូ សមាគមអតីតយុទ្ធជន និងនិវត្តជនកម្ពុជា បន្តជួបសំណេះសំណាល និងពិភាក្សាការងារជាមួយថ្នាក់ដឹកនាំ និងសមាជិកនៃសមាគមមិត្តភាពរណសិរ្សភូមិភាគនិរតីកម្ពុជា។

នៅក្នុងជំនួបដ៏មានអត្ថន័យនោះ ខ្ញុំ បាននាំនូវការសាកសួរសុខទុក្ខ និងមនោសញ្ចេតនានឹករលឹកយ៉ាងជ្រាលជ្រៅពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនចំពោះបងប្អូនអតីតកងទ័ពស្ម័គ្រចិត្តវៀតណាមនៃសមាគមមិត្តភាពរណសិរ្សភូមិភាគនិរតីកម្ពុជាទាំងអស់។

ក្នុងជំនួបនេះ ខ្ញុំ បានសម្តែងនូវការកោតសរសើរចំពោះការរួមចំណែករបស់អតីតកងទ័ពស័្មគ្រចិត្តវៀតណាមដែលបានចូលរួមយ៉ាងសកម្មក្នុងបុព្វហេតុតស៊ូរំដោះប្រទេសជាតិ។

ជាចុងក្រោយ ខ្ញុំ និងថ្នាក់ដឹកនាំ និងសមាជិកនៃសមាគមមិត្តភាពរណសិរ្សភូមិភាគនិរតីកម្ពុជា បានផ្លាស់ប្តូរយោបល់អំពីការពង្រឹងទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការរវាងអតីតយុទ្ធជនកម្ពុជា និងវៀតណាម ព្រមទាំងការថែរក្សាប្រវត្តិសាស្ត្រ និងបន្តផ្សព្វផ្សាយអំពីស្មារតីមិត្តភាព និងការជួយគ្នាទៅវិញទៅមករវាងប្រជាជន និងអតីតយុទ្ធជននៃប្រទេសទាំងពីរ៕

ក្នុងឱកាសដឹកនាំគណៈប្រតិភូជាន់ខ្ពស់សមាគមអតីតយុទ្ធជនកម្ពុជា បំពេញទស្សនកិច្ចផ្លូវការនៅសាធារណរដ្ឋសង្គមនិយមវៀតណាម ខ្ញុំបានជួបសំណេះសំណាលជាមួយអតីតកងទ័ពស្ម័គ្រចិត្ត និងជំនាញការវៀតណាមរណសិរ្ស ៤៧៩។

នៅក្នុងជំនួបដ៏មានអត្ថន័យនោះ ខ្ញុំ បានពាំនាំនូវការសាកសួរសុខទុក្ខ និងមនោសញ្ចេតនានឹករលឹកយ៉ាងជ្រាលជ្រៅពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនចំពោះបងប្អូនអតីតកងទ័ពស្ម័គ្រចិត្តវៀតណាមទាំងអស់។

ឆ្លៀតក្នុងឱកាសនោះ ខ្ញុំ បានសម្តែងនូវការអរគុណយ៉ាងជ្រាលជ្រៅបំផុតចំពោះ បក្ស រដ្ឋ កងទ័ព និងប្រជាជនវៀតណាម ជាពិសេសវីរភាព និងការលះបង់សាច់ស្រស់ឈាមស្រស់របស់កងទ័ពស្ម័គ្រចិត្តរណសិរ្ស ៤៧៩ ដែលបានជួយរំដោះប្រជាជនកម្ពុជាឱ្យរួចផុតពីរបបប្រល័យពូជសាសន៍ ប៉ុល ពត និងបានការពារការរស់ឡើងវិញរបស់កម្ពុជា៕

ព្រឹកនេះ ខ្ញុំ បានជួបពិភាក្សា និងស្រស់ស្រូបអាហារពេលព្រឹកជាមួយ លោកជំទាវ ទូច សុផារ័ត្ន ឯកអគ្គរដ្ឋទូតនៃព្រះរាជាណាចក្រកម្ពុជាប្រចាំនៅសាធារណរដ្ឋសង្គមនិយមវៀតណាម មុននឹងបន្តដំណើរទស្សនកិច្ចការងារនៅប្រទេសវៀតណាម ក្នុងឱកាសមហាសន្និបាតតំណាងទូទាំងប្រទេសសមាគមអតីតយុទ្ធជនវៀតណាមលើកទី៨ នៅរដ្ឋធានីហាណូយ ប្រទេសវៀតណាម។ #ប្រទេសវៀតណាម

ខ្ញុំ បានដឹកនាំគណៈប្រតិភូសមាគមអតីតយុទ្ធជន និងនិវត្តជនកម្ពុជា ដើម្បីចូលរួមមហាសន្និបាតតំណាងទូទាំងប្រទេសសមាគមអតីតយុទ្ធជនវៀតណាមលើកទី៨ អាណត្តិ២០២៦-២០៣១។

ក្នុងឱកាសនោះ ខ្ញុំ បាននាំនូវសារលិខិតជូនពររបស់សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ប្រធានគណបក្សប្រជាជនកម្ពុជា និងជាប្រធានសមាគមអតីតយុទ្ធជននិងនិវត្តជនកម្ពុជា ផ្ញើជូនសមាគមអតីតយុទ្ធជនវៀតណាម៕

រដ្ឋធានីហាណូយ, ថ្ងៃទី១៧ ខែមិថុនា ឆ្នាំ២០២៦

ថ្ងៃនេះ ខ្ញុំ បានចុះពិនិត្យសកម្មភាពការងារនៃការបន្តសាងសង់ផ្ទះបណ្តោះអាសន្នសម្រាប់ប្រជាពលរដ្ឋភៀសសឹក ស្ថិតក្នុងភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។

សកម្មភាពនៃការបន្តសាងសង់ផ្ទះបណ្តោះអាសន្ននេះ គឺជាយុទ្ធសាស្ត្រគិតគូរវែងឆ្ងាយរបស់រាជរដ្ឋាភិបាលសម្រាប់ប្រជាពលរដ្ឋភៀសសឹក ពិសេសស្រ្តីមានផ្ទៃពោះ និងកុមារ និងដើម្បីធានាថាបងប្អូនប្រជាពលរដ្ឋភៀសសឹកមានកន្លែងស្នាក់នៅសមរម្យ ប្រកបដោយសុវត្ថិភាព និងសុខុមាលភាពបំផុត៕

ខ្ញុំ បានបន្តនាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន​ ប្រមុខរដ្ឋស្ដីទី នៃព្រះរាជាណាចក្រកម្ពុជា ចែកជូនប្រជាពលរដ្ឋភៀសសឹកសរុបចំនួន​ ៧៦៥គ្រួសារ​ នៅមណ្ឌលសុវត្ថិភាពវត្តបូណ៌ខ្នាតេជោ​ ឃុំ​ចន្លាស់ដៃ​ ស្រុក​ក្រឡាញ់​ ខេត្តសៀមរាប។

រសៀលនេះ ខ្ញុំ បានបន្តនាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ប្រធានព្រឹទ្ធសភា នៃព្រះរាជាណាចក្រកម្ពុជា ចែកជូនប្រជាពលរដ្ឋភៀសសឹកចំនួន ៧៥០គ្រួសារ ស្នាក់នៅផ្ទះបណ្តោះអាសន្ន ស្ថិតក្នុងភូមិស្រះឈូក ឃុំពង្រ ស្រុកចុងកាល់ ខេត្តឧត្តរមានជ័យ។

ខ្ញុំ សូមថ្លែងអំណរគុណយ៉ាងជ្រាលជ្រៅជូនចំពោះសម្តេចអគ្គមហាសេនាបតីតេជោ ហ៊ុន សែន ដែលតែងតែខ្វល់ខ្វាយ និងតាមដានជាប់ជាប្រចាំអំពីសុខទុក្ខប្រជាពលរដ្ឋភៀសសឹកតាមបណ្តាខេត្តជាប់ព្រំដែន៕

ព្រឹកនេះ ខ្ញុំ បាននាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ប្រធានព្រឹទ្ធសភា នៃព្រះរាជាណាចក្រកម្ពុជា ចែកជូនប្រជាពលរដ្ឋភៀសសឹកចំនួន ៧២៤គ្រួសារ ស្នាក់នៅផ្ទះបណ្តោះអាសន្ន ស្ថិតក្នុងភូមិតាកឹងបៃតង ឃុំថ្មី ស្រុកគូលែន ខេត្តព្រះវិហារ។

ខ្ញុំ សូមថ្លែងអំណរគុណយ៉ាងជ្រាលជ្រៅជូនចំពោះសម្តេចអគ្គមហាសេនាបតីតេជោ ហ៊ុន សែន ដែលតែងតែខ្វល់ខ្វាយ និងតាមដានជាប់ជាប្រចាំអំពីសុខទុក្ខប្រជាពលរដ្ឋភៀសសឹកតាមបណ្តាខេត្តជាប់ព្រំដែន។

បន្ទាប់ពីពិធីចែកអំណោយ ខ្ញុំ បានចុះសួរសុខទុក្ខក្មួយៗសិស្សានុសិស្ស និងពិនិត្យពីការសិក្សានៅសាលាបណ្តោះអាសន្នក្នុងភូមិតាកឹងបៃតងផងដែរ៕

ថ្ងៃនេះ ក្នុងនាមប្រធានក្រុមការងាររាជរដ្ឋាភិបាលចុះមូលដ្ឋានខេត្តឧត្តរមានជ័យ, ខ្ញុំ បានអមដំណើរសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ប្រធានព្រឹទ្ធសភា នៃព្រះរាជាណាចក្រកម្ពុជា អញ្ជើញជាអធិបតីភាពដ៏ខ្ពង់ខ្ពស់ក្នុងពិធីសំណេះសំណាលក្រុមប្រឹក្សាខេត្ត ក្រុង ស្រុក ឃុំ-សង្កាត់ និងថ្នាក់ដឹកនាំមន្ទីរ-អង្គភាពជុំវិញខេត្តសៀមរាប-ឧត្តរមានជ័យ។