Neth Pheaktra

ឯកឧត្តម ប្រាក់ ថាវអមិដា អនុរដ្ឋលេខាធិការ និងជានាយកខុទ្ទកាល័យក្រសួងព័ត៌មាន នាព្រឹកថ្ងៃទី១៧ ខែមិថុនា ឆ្នាំ២០២៦នេះ បានអញ្ជើញដឹកនាំក្រុមការងារ នាំយកកង់ចំនួន ៦៥គ្រឿង ព្រមទាំងមួកសុវត្ថិភាព កាតាប និងសម្ភារសិក្សាចំនួន ៦៥ឈុត ចែកជូនដល់សិស្សានុសិស្សដែលមានជីវភាពខ្វះខាតចំនួន ៦៥នាក់ មកពីឃុំចំនួន៣ រួមមាន៖ ឃុំសណ្តាន់ ឃុំកោះខ្ញែរ និងឃុំសំបូរ ក្នុងស្រុកសំបូរ ខេត្តក្រចេះ។ ពិធីនេះបានធ្វើឡើងនៅសាលាបឋមសិក្សាសំបូរ ស្រុកសំបូរ ខេត្តក្រចេះ។ ពិធីចែកអំណោយនេះ មានការអញ្ជើញចូលរួមពីក្រុមការងារក្រសួងព័ត៌មាន តំណាងមន្ទីរព័ត៌មាន ខេត្តក្រចេះ គណៈអភិបាលស្រុកសំបូរ តំណាងការិយាល័យអប់រំ យុវជន និងកីឡាស្រុកសំបូរ នាយកសាលា លោកគ្រូ អ្នកគ្រូ មាតាបិតា អាណាព្យាបាល ព្រមទាំងសិស្សានុសិស្សដែលទទួលបានអំណោយ។

កង់ មួកសុវត្ថិភាព កាតាប និងសម្ភារសិក្សាទាំងនេះ គឺជាអំណោយសប្បុរសធម៌របស់ឧកញ៉ា ទូច គីម និងលោកស្រី ឈួន ហ្លូរីណា ព្រមទាំងក្រុមគ្រួសារ ដែលបានផ្តល់ជូនតាមរយៈលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ។
អំណោយដ៏ថ្លៃថ្លានេះនឹងរួមចំណែកជួយសម្រាលបន្ទុកគ្រួសារសិស្សានុសិស្សដែលកំពុងជួបប្រទះការលំបាក ជាពិសេសសិស្សដែលរស់នៅតំបន់ដាច់ស្រយាលក្នុងស្រុកសំបូរ។ កង់ទាំងនេះនឹងជួយកាត់បន្ថយពេលវេលាធ្វើដំណើរទៅមកសាលារៀន លើកទឹកចិត្តឱ្យសិស្សមករៀនបានទៀងទាត់ និងជួយបង្កើនឱកាសសិក្សារបស់កុមារ ដើម្បីឆ្ពោះទៅរកអនាគតកាន់តែល្អប្រសើរ។

ក្នុងនាមជាតំណាងឯកឧត្តមរដ្ឋមន្ត្រី នេត្រ ភក្ត្រា, ឯកឧត្តម ប្រាក់ ថាវអមិដា បានថ្លែងអំណរគុណយ៉ាងជ្រាលជ្រៅចំពោះឧកញ៉ា ទូច គីម និងលោកស្រី ឈួន ហ្លូរីណា ព្រមទាំងក្រុមគ្រួសារ ដែលបានចូលរួមចំណែកក្នុងសកម្មភាពសប្បុរសធម៌ជាមួយក្រសួងព័ត៌មាន ដើម្បីគាំទ្រដល់ការសិក្សារបស់សិស្សានុសិស្សនៅតំបន់មូលដ្ឋាន។ ឯកឧត្តម ប្រាក់ ថាវអមិដា ក៏បានផ្តាំផ្ញើដល់ក្មួយៗជាសិស្សានុសិស្សទាំងអស់ ត្រូវខិតខំប្រឹងប្រែងសិក្សារៀនសូត្រ គោរពវិន័យសាលា ស្តាប់ដំបូន្មានលោកគ្រូ អ្នកគ្រូ និងមាតាបិតា ដើម្បីក្លាយខ្លួនជាកូនល្អ សិស្សល្អ និងពលរដ្ឋល្អសម្រាប់សង្គមជាតិ។

ជាមួយគ្នានេះ ឯកឧត្តម ប្រាក់ ថាវអមិដា បានណែនាំឱ្យក្មួយៗយកចិត្តទុកដាក់ខ្ពស់ចំពោះសុវត្ថិភាពក្នុងការធ្វើដំណើរលើដងផ្លូវ ជាពិសេសត្រូវពាក់មួកសុវត្ថិភាព និងប្រើប្រាស់កង់ដោយប្រុងប្រយ័ត្នរាល់ពេលធ្វើដំណើរទៅមកសាលារៀន៕

ទូលព្រះបង្គំ​ សូមលំឱនកាយ វាចាចិត្ត លើកហត្ថទាំងទ្វេប្រណមបួងសួងដល់គុណបុណ្យព្រះរតនត្រ័យ ទេវតាថែរក្សាព្រះមហាសេ្វតច្ឆត្រ និងព្រះបារមីដ៏វិសុទ្ធនៃព្រះដួងវិញ្ញាណក្ខន្ធអតីតព្រះមហាក្សត្រខ្មែរគ្រប់ព្រះអង្គ សូមតាមជួយបីបាច់គ្រងថែរក្សា និងប្រោសប្រទាននូវព្រះរាជសព្ទសាធុការពរ ព្រះសិរីសួស្តី ជ័យមង្គល និងសេចក្តីចម្រើនរុងរឿងដ៏មហាប្រសើរគ្រប់ប្រការ ថ្វាយចំពោះ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុតរបស់ប្រជារាស្ត្រខ្មែរ នាឱកាសដ៏ឧត្តុង្គឧត្តមនៃព្រះរាជពិធីបុណ្យចម្រើនព្រះជន្ម នាថ្ងៃទី១៨ ខែមិថុនា ឆ្នាំ២០២៦ នេះ។

រូបភាពអនុស្សាវរីយ៍អំឡុង ថ្នាក់ដឹកនាំ សសយក អញ្ជើញចូលគាល់សម្តេចយាយជាទីគោរពសក្ការៈដ៏ខ្ពង់ខ្ពស់បំផុត កាលពីថ្ងៃទី១២ ខែមិថុនា ឆ្នាំ២០២៥ កន្លងទៅ។

Chinese FM Visits Cambodian King, Queen Mother

Upon the entrustment of Chinese President Xi Jinping, Chinese Foreign Minister Wang Yi on June 17 visited Cambodian King Norodom Sihamoni and Queen Mother Norodom Monineath Sihanouk, who are in Beijing for medical check-ups and recuperation.
https://www.cctvplus.com/news/20260618/8485062.shtml #!language=1

source CCTV

China-FM/Cambodia Chinese FM visits Cambodian King, Queen Mother

ថ្វាយគ្រឿងសក្ការៈបូជាព្រះអង្គចេកព្រះអង្គចម និងបច្ច័យប្រគេនព្រះសង្ឃ សូមសេចក្តីសុខសេចក្តីចម្រើន

អបអរសាទរកម្ពុជាជាប់ឆ្នោតក្នុងគណ:កម្មការអន្តររដ្ឋាភិបាល ដើម្បីកិច្ចការពារបេតិកភណ្ឌវប្បធម៌អរូបីសម្រាប់អណត្តិ២០២៦-២០៣០

ក្នុងសម័យប្រជុំលើកទី១១ នៃរដ្ឋភាគីអនុសញ្ញាស្តីពីកិច្ចការពារបេតិកភណ្ឌវប្បធម៌អរូបីឆ្នាំ២០០៣ ដែលកំពុងប្រព្រឹត្តទៅនាទីស្នាក់ការកណ្តាល អង្គការយូណេស្កូ នៅថ្ងៃទី១៧-១៨ ខែមិថុនា ឆ្នាំ២០២៦ ហើយមានការចូលរួមពីរដ្ឋភាគីចំនួន១៨៥ប្រទេស កម្ពុជាត្រូវបានអង្គប្រជុំបោះឆ្នោតគាំទ្រជាប់ ជាសមាជិកគណ:កម្មការអន្តររដ្ឋាភិបាល ដើម្បីកិច្ចការពារបេតិកភណ្ឌវប្បធម៌អរូបីសម្រាប់អណត្តិឆ្នាំ២០២៦-២០៣០។

គណ:ប្រតិភូតំណាងរាជរដ្ឋាភិបាលកម្ពុជា ចូលរួមក្នុងសម័យប្រជុំនេះដឹកនាំដោយលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានគណ:កម្មការជាតិយូណេស្កូកម្ពុជា ព្រមទាំងមានការចូលរួមដោយលោក ឡុង កុសល ឯកអគ្គរាជទូតប្រតិភូអចិន្ត្រៃយ៍កម្ពុជា ប្រចាំអង្គការយូណេស្កូ និងក្រុមការងារអន្តរក្រសួងអញ្ជើញមកពីក្រសួងការបរទេស និងសហការប្រតិបត្តិការអន្តរជាតិ ក្រសួងវប្បធម៌និងវិចិត្រសិល្ប: និងគណ:កម្មកាជាតិយូណេស្កូកម្ពុជា៕

ប្រាង្គប្រាសាទតាព្រហ្ម និងបាយ័ន ១៦ មិថុនា ២០២៦

ការជួបជុំនិវត្តន៍ជនរបស់ក្រសួងព័ត៌មានចំនួន ២៥០ រូប, និងមានជំនួបជាបន្តបន្ទាប់ទៀត ខណៈក្រសួងព័ត៌មានមាននិវត្តន៍ជនចំនួន ១០៩៧ រូបនៅទូទាំងប្រទេស។ ជំនួបនេះមិនមែនគ្រាន់តែជាការជួបជុំធម្មតានោះទេ ប៉ុន្តែជាឱកាសដ៏មានអត្ថន័យសម្រាប់យើងទាំងអស់គ្នា ក្នុងការរំលឹកគុណូបការៈ ការលះបង់ ការខិតខំប្រឹងប្រែង និងស្នាដៃរបស់ថ្នាក់ដឹកនាំ និងមន្ត្រីជំនាន់មុន ដែលបានចូលរួមយ៉ាងសំខាន់ក្នុងការកសាង ការពារ និងអភិវឌ្ឍវិស័យព័ត៌មានរបស់កម្ពុជា។

វត្តមានរបស់និវត្តន៍ជននៅថ្ងៃនេះ គឺជាការរំលឹកដ៏មានតម្លៃថា ក្រសួងព័ត៌មាននាពេលបច្ចុប្បន្ន មិនមែនកើតឡើងដោយឯកឯងនោះឡើយ ប៉ុន្តែត្រូវបានកសាងឡើងលើមូលដ្ឋាននៃកម្លាំងកាយ កម្លាំងចិត្ត បទពិសោធន៍ ស្មារតីទទួលខុសត្រូវ និងការលះបង់របស់មន្ត្រីជំនាន់មុន ដែលបានបម្រើការងារជូនក្រសួង ជូនប្រជាពលរដ្ឋ និងជូនប្រទេសជាតិដោយស្មោះត្រង់។

នៅក្នុងដំណើររបស់ក្រសួងព័ត៌មាន យើងមិនអាចភ្លេចបានឡើយនូវតួនាទី និងស្នាដៃរបស់មន្ត្រីជំនាន់មុន។ ក្នុងរយៈពេលកន្លងមក ឯកឧត្តម លោកជំទាវ លោក លោកស្រី បានចូលរួមបំពេញភារកិច្ចក្នុងបរិបទ និងស្ថានភាពមិនងាយស្រួល។ មានពេលខ្លះ ធនធាននៅមានកម្រិត សម្ភារៈបច្ចេកទេសមិនទាន់ទំនើប លក្ខខណ្ឌការងារមិនទាន់ល្អប្រសើរដូចសព្វថ្ងៃ ប៉ុន្តែបងប្អូនមន្ត្រីជំនាន់មុននៅតែប្រឹងប្រែងបំពេញភារកិច្ចដោយភាពអត់ធ្មត់ ភក្តីភាព វិន័យ និងស្មារតីបម្រើជាតិខ្ពស់។

ស្នាដៃទាំងនេះ មិនគួរត្រូវបានមើលរំលងឡើយ។ ស្នាដៃទាំងនេះ គឺជាគ្រឹះដ៏រឹងមាំ ដែលបានបន្តមកដល់មន្ត្រីជំនាន់បច្ចុប្បន្ន។ ដូច្នេះ យើងខ្ញុំជាមន្ត្រីជំនាន់ក្រោយ សូមសម្តែងនូវការគោរព ការដឹង គុណ និងការកោតសរសើរយ៉ាងជ្រាលជ្រៅចំពោះគុណូបការៈរបស់និវត្តន៍ជនទាំងអស់។