Tapang Parañaque

𝐏𝐀𝐇𝐀𝐘𝐀𝐆 𝐒𝐀 𝐁𝐔𝐍𝐎𝐍𝐆 𝐁𝐑𝐀𝐒𝐎 𝐓𝐎𝐔𝐑𝐍𝐀𝐌𝐄𝐍𝐓 𝐍𝐀 𝐆𝐈𝐍𝐀𝐆𝐀𝐍𝐀𝐏 𝐍𝐆𝐀𝐘𝐎𝐍 𝐒𝐀 𝐏𝐀𝐑𝐀Ñ𝐀𝐐𝐔𝐄 𝐒𝐏𝐎𝐑𝐓𝐒 𝐂𝐎𝐌𝐏𝐋𝐄𝐗

Kasalukuyang nagaganap ang isang bunong braso tournament sa Parañaque Sports Complex, sa Barangay San Antonio. Ipinagpatuloy ito sa kabila ng kawalan ng maayos na tulugan, at makakain ng mga taong nasunugan sa Lower Barangay.

Mariin namin itong kinokondena. Malinaw ito na pagpapakita kung ano ang prayoridad ng mga namumunong ito sa gitna ng krisis ng mga taga San Antonio. Insensitibo at mistulang kawalan ng pake ang pagpapaskil ng larawan ng kasiyahan, at katuwaan kahit na literal na nasa labas lang ng pinto ang mga nasunugan habang naiinitan.

𝘞𝘢𝘭𝘢 𝘴𝘪𝘭𝘢𝘯𝘨 𝘮𝘢𝘵𝘶𝘭𝘶𝘨𝘢𝘯. Pero pinili niyong unahing bigyan ng espasyo ang bunong braso bago ang mga taong nawalan ng tirahan.

𝘞𝘢𝘭𝘢 𝘴𝘪𝘭𝘢𝘯𝘨 𝘮𝘢𝘬𝘢𝘪𝘯. Pero sa mismong bidyo na pinaskil niyo, malinaw ang sako sakong bigas na nakatambak sa loob mismo ng gym na ipinagkakait niyo sa tao.

Walang halaga ang bunong braso tournament na yan kung ikukumpara sa halos ISANG LIBONG PAMILYA na nawalan ng tirahan at ari-arian. Ang gobyerno niyo ang NAGBABRASO sa tao para mag alsa at magalit sa inyo.

Ito ang panawagan namin: 𝙃𝙪𝙢𝙞𝙣𝙜𝙞 𝙠𝙖𝙮𝙤 𝙣𝙜 𝙩𝙖𝙬𝙖𝙙 𝙨𝙖 𝙩𝙖𝙤. Ilatag niyo ang plano niyo para sa mga nasunugan. Repasuhin niyo ang sistema ng ayuda. Unahin ang dignidad ng mga taong nawalan ng tirahan.

Sa panahon ng sakuna, hindi bunong braso ang sukatan ng lakas ng liderato. 𝘼𝙣𝙜 𝙩𝙪𝙣𝙖𝙮 𝙣𝙖 𝙡𝙖𝙠𝙖𝙨 𝙖𝙮 𝙣𝙖𝙨𝙖 𝙠𝙖𝙠𝙖𝙮𝙖𝙝𝙖𝙣𝙜 𝙪𝙣𝙖𝙝𝙞𝙣 𝙖𝙣𝙜 𝙩𝙖𝙤 𝙠𝙖𝙮𝙨𝙖 𝙥𝙖𝙡𝙖𝙗𝙖𝙨, 𝙢𝙖𝙡𝙖𝙨𝙖𝙠𝙞𝙩 𝙠𝙖𝙮𝙨𝙖 𝙞𝙢𝙖𝙝𝙚, 𝙖𝙩 𝙖𝙜𝙖𝙧𝙖𝙣𝙜 𝙖𝙠𝙨𝙮𝙤𝙣 𝙠𝙖𝙮𝙨𝙖 𝙥𝙖𝙜𝙥𝙖𝙥𝙖𝙗𝙖𝙣𝙜𝙤 𝙣𝙜 𝙥𝙖𝙣𝙜𝙖𝙡𝙖𝙣.

Habang may halos isang libong pamilyang natutulog sa init at abo, bawat oras na inuuna ninyo ang paligsahan ay dagdag na sampal sa mga nawalan na ng lahat. Hindi ito simpleng pagkukulang. Isa itong malinaw na pagtalikod sa tungkulin ninyo sa mamamayan ng San Antonio.

ANG MGA MANGGAGAWA, BAYANI.
MATATAPANG AT LUMALABAN!

Mayo Uno, taong 1903, mahigit isang daang manggagawang Pilipino ang nagmartsa mula Plaza Moriones ng Tondo patungo sa Mendiola para magpatawag ng nakabubuhay na sahod at pagtigil sa pangongolonya ng US sa Pilipinas.

Sa mahigit isang daang taong pakikibaka ng mga manggagawa, nananaig pa rin ang mga hindi makatwirang kondisyon sa trabaho, at mababang pasahod ng mga malalaking negosyante mapa pribado man o gobyerno.

Kasabay ng pagkilala sa kabayanihan nating mga manggagawa, dapat gamitin ang araw na ito para kilalanin at paingayin ang mga isyung kinakaharap natin. Batid natin ito sa konteksto ng Lungsod ng Parañaque. Salamat sa inyong serbisyo:

Sa ating mga MANGINGISDA sa La Huerta, na patuloy na iniipit ng hindi makatarungang reklamasyon, na naghaharing-uri lang naman ang makikinabang.

Sa ating mga G**O sa Parañaque, na patuloy na pinagkakaitan ng makatarungang pasahod, kahit na nagkakandakuba na sa trabaho.

Sa ating mga NARS, DOKTOR, ng dalawang OSPAR, na sumasalo ng galit ng tao sa sirang sistema ng kalusugan. Sa pagpapatuloy kahit kulang ang kagamitan, at hindi sapat ang bayad.

Sa ating mga KOLEKTOR NG BASURA sa buong lungsod, sa pagsasakripisyo ng inyong katawan para panatilihing malinis ang ating bayan. Sa kabila ng kawalan ng seguridad sa kalusugan, at sa baryang sinasahod sa arawan.

Sa ating mga BPO AGENT mula Sto. Niño hanggang BF Homes, na patuloy na binabarat ng mga dayuhang kumpanya at nakakaranas ng mga hindi makatarungang kondisyon sa trabaho.

Sa ating mga KAWANI NG GOBYERNO mula barangay hanggang lokal, na patuloy na nakakaranas ng kawalan ng seguridad sa trabaho. Barat ang pasweldo, tinatakot at tinuturing na alila ng mga nakaupo.

Gaano man kalaki o kaliit, lahat tayo ay nagbabayad ng buwis. Lahat tayo ay nagtatrabaho. Lahat tayo ay manggagawa!

Makisama sa protesta! Matapang na ilaban ang makatarungang pasahod, at karapatan para sa lahat ng uring manggagawa!

MAGNAKAW PWEDE, MAG-PARK NG MOTOR BAWAL?

Mariing kinokondena ng Tapang Parañaque ang hindi makatarungang pangungumpiska ng ari-arian ng mga mamamayan sa Greenhills, San Dionisio!

Sa panahon ng krisis, ng nagtataasang presyo ng langis at bilihin, inuna pang atupagin ng administrasyon ng mga Olivarez at kapitan ng San Dionisio na supilin ang mga nasa laylayan imbis na tugunan ang mas mabibigat na isyu sa lipunan!

Hindi ito iisang insidente lamang. Ang gobyerno ng Parañaque, sa ilalim ng pamilya ng mga Olivarez ay paulit ulit na nagpapakita ng paulit ulit na panggigipit sa iba't ibang sulok ng Parañaque. Mula sa pangungumpiska ng mga katiting na ari-arian, kabuhayan, hanggang sa pagbabanta ng demolisyon sa mga kabahayan!

Huwag din nating kalimutan ang pananahimik ng hari-hariang pamilya na ito sa isyu ng flood control, na BILYONES ang pondo sa lungsod ng Parañaque. Walang batbat ang isang motorsiklo na kinukumpiska niyo sa halaga ng BILYONES na mistulang nawawala sa ilalim ng pamumuno ninyo!

Ang panawagan namin, itigil ninyo ang pang-iipit sa mga normal na tao. Bumaba kayo mula sa mga opisina at makipagdayalogo. Bigyan ng puwang ang mga tao para sumunod sa mga gusto ninyo. Pagiging makatao ang dapat manaig sa ganitong pagkakataon na hinahamon ang pagiging lider ninyo.

At kung may dapat kayong unahin, ito ay ang pagsupil niyo sa mga magnanakaw sa sarili niyong hanay. Tapatin ang tao sa pera ng bayan, at bumaba kayo sa pwesto kung patuloy niyong pagsisilbihan ang mga sarili ninyo!

Ngayong ika-walumput apat na taong ginugunita natin ang Fall of Bataan, maging tanda sana sa atin ang pagpapakita ng giting ng ating mga bayani.

Nawa’y maging aral at pamana ang kanilang pakikibaka at pagmartsa na malayo pa man ang ating lalakbayin ngunit malayo na rin ang narating.

Kami sa Tapang Parañaque ay sumasaludo at nagpapasalamat sa ating mga bayani sa kanilang inalay na sakripisyo para sa Inang Bayan.

NAKIKIISA ANG TAPANG PARAÑAQUE SA LABAN NATING MASA AT NG ATING MGA TSUPER

Patuloy na tumataas ang presyo ng langis. May mga gasolinahang pumapalo na sa 120+ pesos ang kada litro. Sa isang araw ng pasada, hindi na aabot ng 200 pesos ang maiuuwi ng isang jeepney driver.

Patuloy nating panawagan ang PAGTANGGAL NG VAT AT EXCISE TAX, kasabay ng PAGBASURA SA OIL DEREGULATION LAW!

Hindi dapat matapos sa ayuda ang solusyon ng lokal na pamahalaan! Ang hinahanap natin ay pangmatagalang solusyon na hindi nakapasan sa likod ng mga normal na mamamayan!

Makisama, makisangkot, matapang na lumaban!

𝗡𝗮𝗸𝗶𝗶𝘀𝗮 𝗮𝗻𝗴 𝗧𝗮𝗽𝗮𝗻𝗴 𝗣𝗮𝗿𝗮ñ𝗮𝗾𝘂𝗲 𝘀𝗮 𝗽𝗿𝗼𝘁𝗲𝘀𝘁𝗮 𝗻𝗴 𝗺𝗴𝗮 𝘁𝘀𝘂𝗽𝗲𝗿 𝗻𝗴 𝗣𝗔𝗖𝗜𝗝𝗢𝗗𝗔 - 𝗣𝗜𝗦𝗧𝗢𝗡 𝗻𝗮 𝗴𝗶𝗻𝗮𝗻𝗮𝗽 𝗻𝗶𝘁𝗼𝗻𝗴 𝗠𝗮𝗿𝘀𝗼 𝟭𝟵, 𝟮𝟬𝟮𝟲.

Direktang pinapasan ng ating mga tsuper ang walang tigil na pagtaas ng presyo ng langis. Sa rutang Sucat–Baclaran pa lang, aabot na sa ₱100 kada litro ang krudo, halos ₱3,500 ang gastos sa maghapon. Sa dulo ng mahabang pasada, maswerte pa ang may ₱200 na naiuuwi.

Kinokondena natin ang pagka inutil ng gobyernong Marcos, at ng mga Olivarez! Ang patuloy na pagpapasa sa mamamayan ng bigat ng krisis ay nagpapalinaw lang kung sino ang pinoprotektahan at kung sino ang pinapabayaan. Hindi tayo papayag na ang pawis ng tsuper ay gawing tubo ng iilan. Hindi sagot ang paghingi ng pakiusap sa mga ganid na kumpanya gaya ng Petron. Kapos ang ayuda na pahirapang makuha, at hindi naman lahat ay nabibigyan.

Ang laban ng tsuper ay laban din nating mga komyuter. Kasabay ng pagtaas ng langis ang pagtaas ng presyo ng pagkain, kuryente, at pamasahe. Ito ang ating mga panawagan:

1. Tanggalin ang VAT at Excise Tax!
2. Irollback ang presyo ng langis. Ipasalo sa mayayamang kumpanya ang pagliit ng tubo!
3. Ibasura ang Oil Deregulation Law na nagtatanggal ng kapangyarihan ng gobyerno para makontrol ang presyo ng langis!

Singilin ang sistemang nagpapahirap sa nakararami! Panahon nang igiit ang tunay na sErbisyo Lang pO, hindi pakitang-tao!

𝗠𝗔𝗧𝗔𝗣𝗔𝗡𝗚 𝗧𝗔𝗬𝗢𝗡𝗚 𝗧𝗜𝗧𝗜𝗡𝗗𝗜𝗚 𝗞𝗔𝗦𝗔𝗠𝗔 𝗡𝗚 𝗞𝗔𝗕𝗔𝗕𝗔𝗜𝗛𝗔𝗡 𝗦𝗔 𝗟𝗔𝗕𝗔𝗡

Ngayong International Women's Day, pinagpupugayan natin ang patuloy na pakikibaka ng kababaihan para sa karapatan ng mga manggagawa, maralita, at buong sambayanan.

Huwag nating kalimutan na ang bawat pisong ninanakaw sa kaban ng bayan ay pondong dapat sana’y napupunta sa serbisyong panlipunan, proteksyon laban sa karahasan, at suporta sa kababaihan.

Ang bawat kabastusan at pangmamaliit na ibinabato sa kababaihan ay lalong nagpapatibay sa kulturang nagtatakda sa atin bilang mababa sa lipunan.

At dito sa Parañaque, malinaw din ang mukha ng problemang ito.

Ang walang katapusang pagpapalitan ng pwesto ng iisang pamilya sa kapangyarihan ay hindi serbisyo. Ito ay pagkakait sa mamamayan ng tunay na representasyon at pananagutan. Habang umiikot lamang ang kapangyarihan sa iilang apelyido, nananatiling napapabayaan ang pangangailangan ng kababaihan, manggagawa, at kabataan.

Hindi tayo mananahimik. Hindi tayo uurong. Matapang tayong titindig kasama ng kababaihan sa laban.

BABAE AY MATAPANG,
TAYO AY MATAPANG!

𝐄𝐃𝐒𝐀 @ 𝟒𝟎 🇵🇭🇵🇭🇵🇭

Kami ay nakikiisa sa taunang pagkilos para magbigay pugay sa kolektibong pagpapatalsik ng masa sa Diktaturyang Marcos Sr.

Ang pagkilos na ito ay paalala na hindi nasa iisang tao, pulitiko, o partido ang kapangyarihan, kung hindi nasa sama-samang pagkilos ng kolektibong masa.

Sumama at mangalampag sa mga kurakot na opisyal mula lokal hanggang nasyonal. Bitbit natin ang panawagan ng hustisya, pagkontra sa korapsyon, at pagtindig laban sa mga pamilyang ginagawang negosyo ang buhay ng masa. Panagutin si Marcos Jr., Sara Duterte, at LAHAT ng sangkot na opisyal sa korapsyon!

MARCOS DUTERTE WALANG PINAG-IBA
PAREHONG KORAP, PAHIRAP SA MASA!