Xarunta Maamulka Gobolka Togdheer

Maanta oo ay taariikhdu tahay 14 June 2026, ayaa xarunta Gobolka Togdheer lagu qabtay kulanka joogtada ah ee u dhexeeya hay’adaha caalamiga ah iyo kuwa maxaliga ah ee ka hawlgala gobolka iyo maamulka Gobolka Togdheer.

Kulankan ayaa diiradda lagu saaray is-weydaarsiga xogaha la xidhiidha hawlaha bani’aadannimo ee ka socda gobolka, si loo xoojiyo wada-shaqaynta iyo isku-duwidda adeegyada ay hay’aduhu bulshada u fidiyaan.

Kulanka waxaa furay Guddoomiyaha Gobolka Togdheer, Maxamuud Cali Saleebaan (Ramaax), oo ka hadlay muhiimadda uu kulankani u leeyahay joogtaynta wada-shaqaynta ka dhaxaysa hay’adaha samafalka iyo laamaha kala duwan ee dowladda. Guddoomiyuhu waxa uu hay’adaha uga mahadceliyey dedaalkooda iyo sida ay uga go’an tahay inay sii wadaan hawlaha gargaarka bani’aadannimo, inkasta oo dunida ay ka jiraan caqabado dhaqaale iyo hoos-u-dhac ku yimid maalgelinta arrimaha samafalka.

Furitaanka kadib, kulanka waxa si wadajir ah u guddoominayey Badhasaab Ku-xigeenka Gobolka Togdheer iyo Hay’adda Candlelight iyaga oo hagayey ajandayaasha iyo doodaha la xidhiidha xaaladaha bani’aadannimo ee gobolka iyo qorshayaasha iskaashiga mustaqbalka.

Guddoomiyaha Gobolka Togdheer, Maxamuud Cali Saleebaan (Ramaax), iyo Guddoomiyaha Sherkadaha Dahabshiil Group, Xaaji Maxamed Siciid Ducaale, ayaa maanta si rasmi ah u daahfuray dhismaha cusub ee Xarunta Dahabshiil Bank ee magaalada Burco.

Munaasabadda daahfurka ayaa waxaa ka soo qayb-galay masuuliyiin heer gobol iyo degmo, madax ka tirsan Dahabshiil Group, ganacsato, waxgarad iyo qaybaha kala duwan ee bulshada. Dhismahan cusub ayaa lagu tilmaamay mid casri ah oo loogu talagalay in lagu xoojiyo adeegyada bangiyada isla markaana kor loogu qaado tayada adeegyada maaliyadeed ee la gaadhsiinayo bulshada.

Guddoomiyaha Gobolka Togdheer, Maxamuud Cali Saleebaan (Ramaax), ayaa bogaadiyey doorka ay Dahabshiil ka qaadato horumarka dalka, isaga oo xusay in xaruntan cusub ay wax weyn ka tari doonto koboca dhaqaalaha iyo fududaynta adeegyada maaliyadeed ee gobolka.

𝐓𝐀𝐂𝐒𝐈

Guddoomiyaha Gobolka Togdheer, Mudane Maxamuud Cali Saleebaan (Ramaax), waxa uu tacsi tiiraanyo leh u dirayaa dhammaan qoyska, ehelada, qaraabada iyo asxaabta ay ka baxday ALLE ha u naxariistee Marxuumad Nimco Cabdi Dheeg, oo ku geeriyootay magaalada Burco.

Guddoomiyuhu waxa uu si gaar ah uga tacsiyaynayaa Guddoomiyaha Xisbiga WADDANI ee Gobolka Togdheer, Mudane Axmed Maxamed Cali (Afyare), oo marxuumaddu ahayd hooyadii.

Guddoomiyuhu waxa uu Alle uga baryayaa marxuumadda inuu janatul-firdowsa ka waraabiyo, dambigeedana dhaafo, samir iyo iimaanna ka siiyo dhammaan qoyskeeda, eheladeeda iyo qaraabadeeda.