Ali Fahle

Tartanka Maratoonka ee Maalinta Dhallinyarada Soomaaliyeed – 15-ka May

Anigoo ka duulaya qiimaha iyo muhiimadda ay leedahay Maalinta Dhallinyarada Soomaaliyeed, waxaan maanta ku maamuusnay munaasabadda 15-ka May tartan maratoon oo aad u xiiso badan, kaasoo ay ka qeyb galeen boqolaal dhallinyaro ah oo ka kala yimid deegaanno kala duwan.

Tartankaan oo ahaa mid ujeedkiisu yahay dhiirrigelinta caafimaadka, is-dhexgalka bulshada iyo kobcinta hibada ciyaareed ee dhallinyarada, wuxuu muujiyay kartida, adkaysiga iyo dadaalka ay leeyihiin jiilka cusub ee Soomaaliyeed.

Waxaa si gaar ah loogu abaalmariyay 150 dhallinyaro ah oo muujiyay heer sare oo guul iyo dadaal ah, kuwaas oo la guddoonsiiyay abaalmarinno kala duwan oo isugu jiray shahaadooyin, billado, iyo hadyado xusuus leh.

Waxaan hambalyo iyo bogaadin u dirayaa dhammaan dhallinyarada ka qeyb gashay tartanka, gaar ahaan kuwa guuleystay. Maalinta 15-ka May waa xusuus qaran oo dhallinyarada Soomaaliyeed ay kaga markhaati kacayaan doorkooda halgan, horumar iyo himilo qaran.

Dhallinyarada waa hannaanka iftiinka mustaqbalka, waxaana mar walba muhiim ah in loo abuuro fursado ay ku horumariyaan noloshooda, kartidooda iyo kaalintooda bulshada dhexdeeda.

Ugu dambeyn, waxaan u mahadcelinayaa xiriirka Soomaaliyeed ee ciyaaraha fudud iyo Guddiga Olympics-ka Soomaaliyeed oo door weyn ka qaatay hirgelinta tartankaan. Sidoo kale, mahad gaar ah ayaan u dirayaa maamulka degmada Hodan oo si hagar la’aan ah ugu dadaalay qabsoomidda munaasabaddan muhiimka ah. Mahadsanidiin dhammaantiin.

Innaa Lillaahi Wa Innaa Ilayhi Raajicuun

Waxaan tacsi tiiraanyo leh u dirayaa dhammaan qoyska, ehelka, qaraabada, asxaabta, iyo guud ahaan bulshada Soomaaliyeed geerida naxdinta leh ee ku timid Alle ha u naxariistee Sheekh Axmed Cali Xeydar, oo ku geeriyooday magaalada Muqdisho.

Waxaan si gaar ah ugu tacsiyeynayaa fannaanada Xamdi Bilan, anigoo la wadaagaya murugada, xanuunka, iyo tiiraanyada geerida Aabaheed.

Ilaahay waxaan uga baryayaa inuu Sheekh Axmed Cali Xeydar ku abaalmariyo Jannatul Firdowsa, qoyska iyo dhammaanteenna samir iyo iimaan naga wada siiyo.

Waxay ahayd maalin taariikhi ah oo aan ku faanayno, maadaama shacabka degmada Hodan ay si rasmi ah u bilaabeen qaadashada kaarka codaynta doorashada qof iyo codka ah.

Muuqaalka shacabka safafka dheer ugu jira sidii ay u heli lahaayeen kaarkooda codaynta waxa uu caddeyn u yahay in dadka reer Hodan diyaar u yihiin inay si xor ah u doortaan ciddii mataleysa.

Waxaan u mahadcelinayaa Guddoomiyaha Gobolka Banaadir iyo ku xigeenkiisa Amniga iyo siyaasadda ,Guddoomiyaha Guddiga madaxa banaan ee doorashooyinka, Taliyaha Ciidanka Boliiska Soomaaliya iyo Taliyaha qeybta guud ee Boliiska Gobolka Banaadir iyo dhammaan shacabka degmada Hodan oo muujiyay biseyl siyaasadeed, dulqaad iyo rabitaan dhab ah oo ku aaddan horumarka dimuqraadiyadda dalka.

Degmada Hodan — Hormuudka Dimuqraadiyadda iyo Horumarka dagmooyinka Gobolka Banaadir