Luçiano Boçi

Kur kauzat ngjyhen me shpifjet e qeverisë

Lidhur me deklaratën e një shpifëseje të paguar dje në protestë, se “Argita Berisha dhe familja e kryeministrit Berisha më kanë marrë 63 hektar tokë në Divjakë”, deklaroj se: kjo është një gënjeshtër e plotë dhe shpifje e turpshme.

Argita Berisha dhe familja e ish-kryeministrit Berisha nuk kanë dhe nuk kanë patur kurrë asnjë metër katror tokë në Divjakë dhe nuk i kanë marrë kujt kurrë asnjë metër katror tokë.

Sali Berisha dhe familja e tij është hetuar për 35 vjet nga militantët e Edi Ramës dhe në përfundim rezultoi se ata kurrë nuk kanë përfituar asnjë lekë publik, asnjë tender dhe asnjë cm2 tokë, publike e as private të tjetërkujt.

Pasi dështuan me shpifjet për interesat e mia e të familjarëve të mi në kullat e Tiranës, ditën kur Edi Rama duhet të jepte përgjigje për vjedhjen e pronës publike të provuar me dokumentat e rastit të hotelit Zig-Zag, duke qenë që përgjigje nuk jepte dot zgjodhi shpifjen.

Përlyerja e kauzave publike me gënjeshtra të dukshme është mjet i qëllimshëm i asfiksimit të kauzës dhe oksigjenimit të kësaj qeverie që ka vjedhur pronat publike e private të shqiptarëve dhe kërkon të fshihet pas shpifësave të saj.

Duke përfunduar Sali Berisha mbështet fuqishëm protestën e rinisë dhe qytetarëve, por natyrisht jo shpifjet dhe shpifësit që e dëmtojnë kauzën e saj.

HISTERIA SHARËSE DHE PARLAMENTI EUROPIAN

Rama vazhdon me statuse sulmesh dhe sharjesh ndaj protestuesve.

Kur kryeministri i vendit detyrohet të merret me flamingot, protestuesit, qytetarët, artistët, gazetarët dhe aktivistët, duke i quajtur “sorra”, “korba” e lloj lloj përcaktimesh, problemi nuk është më vetëm mjedisor. Është moral, politik dhe institucional.

Sepse një qeveri që ka të drejtë e ndërgjegje, sjell dokumente e ndalon abuzimin e jo të çirret me ofendime për njerëzit.
Një qeveri që respekton Europën, nuk tallet me zërin e qytetarëve.Frika ndaj tyre e detyron t’i përgojojë.

Thelbi nuk fshihet pas lojës së emrave, Nartë, Vjosë-Nartë, Pishë Poro-Nartë, Zvërnec.
Kjo është thjesht teknika e vjetër e propagandës.
Kur nuk mbron dot veprën, ngatërron hartën dhe kur nuk justifikon dot ligjin, zhvendos debatin e sulmon qytetarët.

E vërteta është e thjeshtë. Parlamenti Europian nuk foli për një batutë, as për një status rrjetesh sociale, as për “histeri digjitale”.
Parlamenti Europian foli për standarde europiane, për zona të mbrojtura, për ligjin e vitit 2024, për nevojën që Shqipëria të mos ecë drejt Europës duke shkelur natyrën e vet.

Kjo është fitore qytetare. Jo sepse dikush e shpalli nga bulevardi, por sepse Europa e dëgjoi shqetësimin që qeveria e përqeshi.

Kryeministri thotë se qeveria e tij ka të njëjtin qëndrim me rezolutën. Atëherë le ta provojë.
Të ndalojë çdo ndërhyrje, të rishikojë menjëherë ndryshimet ligjore, të garantojë transparencë të plotë, VNM reale dhe jo fasadë, konsultim publik dhe mbrojtje të pakushtëzuar të zonave të ndjeshme.

Sepse Europa nuk matet me deklarata. Matet me ligje, me standarde, me zbatim dhe me respekt për qytetarin.

Flamingot nuk janë problemi i qeverisë. Problemi i qeverisë është se qytetarët nuk pranojnë më që natyra të trajtohet si pronë private e pushtetit dhe si parcelë luksi për klientët e radhës.

Prandaj, më mirë se të merret me “tam-tamet”, “botokset” dhe “followers-at”, kryeministri të merret me pyetjen që nuk e shmang dot.

Pse një vend kandidat për në Bashkimin Europian duhet të penalizohet nga Parlamenti Europian për mbrojtjen e natyrës së vet?

Kjo është çështja.
Të tjerat janë zhurmë. Dhe zhurma është streha e përhershme e poterexhiut me pushtet.