Kuvendi i Shqipërisë

Miratohet Plani Strategjik i Kuvendit të Shqipërisë për periudhën 2026–2030

Kuvendi i Shqipërisë miratoi në seancë plenare, me 82 vota pro, asnjë kundër dhe asnjë abstenim, projektvendimin “Për miratimin e Planit Strategjik të Kuvendit të Shqipërisë 2026–2030”.

Dokumenti përcakton vizionin, objektivat dhe prioritetet strategjike të institucionit për pesë vitet e ardhshme, me synim rritjen e efektivitetit të veprimtarisë parlamentare dhe konsolidimin e një Kuvendi modern, transparent dhe gjithëpërfshirës, me rol të shtuar në forcimin e institucioneve demokratike dhe avancimin e procesit të integrimit evropian të Shqipërisë.

Plani Strategjik përfshin shtatë fusha prioritare dhe 29 objektiva strategjikë, të ndarë sipas funksioneve kryesore të Kuvendit. Konkretisht, ai parashikon pesë objektiva për forcimin e funksionit ligjvënës, katër për rritjen e efektivitetit të funksionit mbikëqyrës, dy për ushtrimin e funksionit zgjedhës, pesë për forcimin e rolit të Kuvendit në procesin e negociatave me Bashkimin Evropian, katër për diplomacinë parlamentare, pesë për rritjen e transparencës, pjesëmarrjes dhe edukimit qytetar, si dhe katër objektiva për përmirësimin e kuadrit rregullator, zhvillimin e burimeve njerëzore dhe modernizimin e infrastrukturës fizike dhe digjitale.

Dokumenti i hartuar nga Administrata e Kuvendit, përbën strategjinë e dytë të këtij lloji për Kuvendin e Shqipërisë, dhe proçesi i hartimit u realizua edhe këtë herë me mbështetjen e OSBE-së.

Kuvendi u mblodh në seancë plenare, miratoi disa projektligje e projektvendime

Në drejtimin e Kryetarit të Kuvendit, z. Niko Peleshi, Kuvendi u mblodh në seancë plenare.

Projektligji “Për dhënie amnistie”, synon krijimin e mundësisë për përfitimin nga amnistia për kategori të caktuara personash, sipas kritereve të përcaktuara në ligj, duke kontribuar në lehtësimin e mbipopullimit në institucionet e ekzekutimit të vendimeve penale dhe duke favorizuar riintegrimin shoqëror të përfituesve.

Ky projektligj u miratua me 84 vota Pro, 0 Kundër, 0 Abstenim.

Projektligji “Për disa ndryshime dhe shtesa në ligjin nr. 8378, datë 22.07.1998, “Kodi Rrugor i Republikës së Shqipërisë”, të ndryshuar”, ku ndryshimet synojnë përmirësimin e sigurisë rrugore, përshtatjen e legjislacionit me standardet bashkëkohore dhe rritjen e efikasitetit të zbatimit të rregullave të qarkullimit rrugor.

Ky projektligj u miratua me 84 vota Pro, 0 Kundër, 0 Abstenim.

Projektligji “Për sektorin e energjisë elektrike”, synon modernizimin e mëtejshëm të tregut të energjisë elektrike, forcimin e sigurisë energjetike dhe harmonizimin e legjislacionit kombëtar me standardet dhe detyrimet që rrjedhin nga procesi i integrimit evropian.

Ky projektligj u miratua me 84 vota Pro, 0 Kundër, 0 Abstenim.

Projektligji “Për informacionin elektronik të transportit të mallrave”, synon digjitalizimin e dokumentacionit dhe shkëmbimit të të dhënave në transportin e mallrave, duke rritur efikasitetin, transparencën dhe ndërveprimin ndërmjet operatorëve ekonomikë dhe institucioneve publike.

Ky projektligj u miratua me 84 vota Pro, 0 Kundër, 0 Abstenim.

Më tej, projektligji “Për një shtesë në ligjin nr. 7703, datë 11.05.1993 “Për sigurimet shoqërore në Republikën e Shqipërisë”, të ndryshuar”, nismë e deputetes znj. Jorida Tabaku, u rrëzua me 80 vota Kundër.

Seanca vijoi me miratimin e projektvendimit “Për miratimin e Planit Strategjik të Kuvendit të Shqipërisë 2026–2030”.

Ky dokument përcakton objektivat dhe prioritetet strategjike të Kuvendit për vitet në vijim, me fokus rritjen e efektivitetit parlamentar, forcimin e transparencës dhe përmirësimin e marrëdhënieve me qytetarët.

Ky projektvendim u miratua me 82 vota Pro, 0 Kundër, 0 Abstenim.

Seanca plenare miratoi gjithashtu projektvendimet:

Projektvendim “Për ngritjen e Nënkomisionit për Auditimin e Sektorit Publik” në përbërje të Komisionit për Ekonominë, Punësimin dhe Financat.

Projektvendim “Për ngritjen e Nënkomisionit për Administratën Publike” në përbërje të Komisionit për Çështjet Ligjore dhe Administratën Publike.

Projektvendim “Për ngritjen e Nënkomisionit për Zhvillim të Qëndrueshëm” në përbërje të Komisionit për Burimet Natyrore, Infrastrukturën dhe Zhvillimin e Qëndrueshëm.

Projektvendim “Për ngritjen e tri nënkomisioneve në përbërje të Komisionit për Bujqësinë, Ushqimin dhe Zhvillimin Rural”.

“Për ngritjen e Nënkomisionit për Integritetin e Informacionit Publik, Dezinformimin dhe Ndërhyrjet e Huaja” në përbërje të Komisionit për të Drejtat e Njeriut dhe Mjetet e Informimit Publik.

Seanca plenare i mbylli punimet rreth orës 19:30.