საქართველოს ინფრასტრუქტურის სამინისტრო

ინფრასტრუქტურის მინისტრი რევაზ სოხაძე და მუნიციპალური განვითარების ფონდის აღმასრულებელი დირექტორი გიორგი შონია მრავალფუნქციური სპორტული კომპლექსებისა და სტადიონების საპროექტო კონკურსებში გამარჯვებული არქიტექტურული ბიუროების წარმომადგენლებს შეხვდნენ, რომლებთანაც ფონდს შესაბამისი ხელშეკრულებები აქვს გაფორმებული.

შეხვედრის ფარგლებში მხარეებმა დეტალური პროექტირების ეტაპები, საპროექტო დოკუმენტაციის მომზადების ვადები და ტექნიკური საკითხები განიხილეს.

ინფრასტრუქტურის მინისტრმა განსაკუთრებული ყურადღება გაამახვილა პროექტების დროულ და ხარისხიან შესრულებაზე. მისი განცხადებით, არქიტექტურული კონკურსების პრაქტიკის დანერგვით სახელმწიფომ მნიშვნელოვანი ნაბიჯი გადადგა, რომლის მიზანიც თანამედროვე, ხარისხიანი და გამორჩეული ინფრასტრუქტურული პროექტების შექმნაა.

„სამინისტრო მზად არის, არქიტექტორებთან ერთად იმუშაოს ყველა იმ საკითხის მოგვარებაზე, რომელიც პროცესში წარმოიშობა. საჭიროების შემთხვევაში, აქტიურად ჩავერთვებით შესაბამის უწყებებთან კოორდინაციაშიც. სახელმწიფომ დარგის განვითარებისთვის მნიშვნელოვანი ნაბიჯები გადადგა და ანალოგიურ პასუხისმგებლობასა და ჩართულობას ელოდება არქიტექტურული ბიუროებისგანაც“, – განაცხადა რევაზ სოხაძემ.

მინისტრმა ასევე აღნიშნა, რომ პროექტირების სამუშაოების დროულად დასრულება კრიტიკულად მნიშვნელოვანია სამშენებლო პროცესის დროულად დაწყებისა და პროექტების დაგეგმილ ვადებში განხორციელებისთვის.

ქვეყნის მასშტაბით სპორტული ინფრასტრუქტურის განვითარება სახელმწიფოსა და ინფრასტრუქტურის სამინისტროს ერთ-ერთი პრიორიტეტული მიმართულებაა. დაგეგმილი პროექტები თანამედროვე სტანდარტების შესაბამისი მრავალფუნქციური სპორტული სივრცეებისა და სტადიონების შექმნას ისახავს მიზნად, რაც ხელს შეუწყობს სპორტის პოპულარიზაციას, ახალგაზრდების აქტიურ ჩართულობასა და ადგილობრივი მოსახლეობისთვის ხარისხიანი ინფრასტრუქტურის ხელმისაწვდომობის ზრდას.

👉იხილეთ ვრცლად:https://s.moi.gov.ge/T6rpJ

👉იხილეთ ვრცლად:https://s.moi.gov.ge/FVcnJ

👉იხილეთ ვრცლად:https://s.moi.gov.ge/Hu9P0