აღსრულების ეროვნული ბიურო

თავდები სრულ პასუხისმგებლობას იღებს მოვალის მიერ ნაკისრი ვალდებულების შესრულებაზე.

🔹თუ მოვალე სესხს არ დაფარავს, პასუხისმგებლობა თავდებსაც დაეკისრება.
🔹სანამ თავდებობას დათანხმდებით, ყურადღებით შეაფასეთ შესაძლო ფინანსური რისკები და სამართლებრივი შედეგები.
🔹ნებისმიერი გადაწყვეტილება პასუხისმგებლობის სრულ გაცნობიერებას უნდა ეფუძნებოდეს.

იუსტიციის მინისტრმა აღმასრულებლებს პროფესიული დღე მიულოცა

იუსტიციის მინისტრმა პაატა სალიამ აღსრულების ეროვნული ბიუროს თანამშრომლებს აღმასრულებელთა საერთაშორისო დღე მიულოცა და პროფესიული საქმიანობის დროს გამოვლენილი მაღალი პროფესიონალიზმისა და პასუხისმგებლობისთვის მადლობა გადაუხადა.

როგორც იუსტიციის მინისტრმა აღნიშნა, აღსრულების სფერო მუდმივად ვითარდება და თანამედროვე გამოწვევებს პასუხობს. ინოვაციების დანერგვა და ინსტიტუციური გაძლიერება კიდევ უფრო ზრდის მომსახურების ხარისხსა და ეფექტიანობას, რაც საბოლოოდ მოქალაქეების ინტერესებს ემსახურება.

აღმასრულებელთა საერთაშორისო დღე, რომელიც აღმასრულებელთა საერთაშორისო კავშირის (UIHJ) ინიციატივით აღინიშნება, მიზნად ისახავს აღმასრულებლის პროფესიის მნიშვნელობის წარმოჩენას და მისი როლის ხაზგასმას სამართლებრივი სახელმწიფოს განვითარებაში.

ღონისძიების ფარგლებში, პაატა სალიამ, ბიუროს ხელმძღვანელთან ლაშა მოძღვრიშვილთან ერთად, პროფესიული მოვალეობების სანიმუშოდ შესრულებისა და მაღალი პასუხისმგებლობისთვის, აღსრულების ეროვნული ბიუროს თანამშრომლები მადლობის სიგელებით დააჯილდოვა.

ღონისძიებას იუსტიციის მინისტრის მოადგილეები, სსიპ-ებისა და სტრუქტურული ერთეულების ხელმძღვანელები და აღსრულების ეროვნული ბიუროს წარმომადგენლები ესწრებოდნენ.

აღსრულების ეროვნული ბიუროს საქმიანობას საქართველოს თავდაცვის სამინისტროს დავით აღმაშენებლის სახელობის თავდაცვის ეროვნული აკადემიის იუნკერები გაეცნენ

სააღსრულებო წარმოების თავისებურებებისა და სამართლებრივი მექანიზმების შესახებ იუნკერებს ინფორმაცია მიაწოდა აღსრულების ეროვნული ბიუროს თავმჯდომარის პირველმა მოადგილე გიორგი მაჭავარიანმა. საუბარი შეეხო, აგრეთვე, სერვისების ხელმისაწვდომობის მიზნით განხორციელებულ რეფორმებს; განსაკუთრებული ყურადღება გამახვილდა მედიაციაზე, როგორც სამართლებრივი დავების მოგვარების მშვიდობიან და თანამედროვე ინსტრუმენტზე.

დისკუსიის მნიშვნელოვანი ნაწილი პრაქტიკული შემთხვევების განხილვას დაეთმო.

მსგავსი ტიპის შეხვედრების მიზანია ახალგაზრდებში სამართლებრივი ცნობიერების ამაღლება და მათში აღმასრულებლის პროფესიის პოპულარიზაცია.