រដ្ឋបាលខេត្តព្រះវិហារ

លោក មិន ស៊ីថា អភិបាលរងខេត្តព្រះវិហារ និងលោក ជោ ម៉ាប់ ប្រធានលេខាធិការដ្ឋានរៀបចំការបោះឆ្នោតខេត្ត អញ្ជើញដឹកនាំកិច្ចប្រជុំផ្សព្វផ្សាយ ជាមួយភាគីពាក់ព័ន្ធ ស្ដីអំពី«ការស្រង់ស្ថិតិប្រជាពលរដ្ឋប៉ាន់ស្មាន» សម្រាប់បម្រើឱ្យការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ ដោយមានការចូលរួមពីមេបញ្ជាការកងកម្លាំងទាំងបី លោក លោកស្រីប្រធានមន្ទីរអង្គភាពជុំវិញខេត្ត អភិបាល ក្រុង ស្រុក អធិការនគរបាលក្រុង ស្រុក មេឃុំ ចៅសង្កាត់ នាយប៉ុស្តិ៍នគរបាលឃុំ សង្កាត់ ជាច្រើនរូប នៅសាលប្រជុំសាលាខេត្តព្រះវិហារ។

២៣ មិថុនា ២០២៦

#រដ្ឋបាលខេត្តព្រះវិហារ

លោក អ៊ុក គឹមសាន អភិបាលរងខេត្តព្រះវិហារ អញ្ជើញទទួលជួបជាមួយសមាគមទឹកស្អាតអាងស្ទឹងសែន និងអង្គការជេស្កូដ (GESCOD) ដើម្បីពិភាក្សាក្នុងការជ្រើសរើសទីតាំងសាងសង់ស្ថានីយទឹកស្អាតថ្មីក្នុងខេត្តព្រះវិហារ ដើម្បីលើកកម្ពស់លទ្ធភាពទទួលបានទឹកស្អាតប្រើប្រាស់ដល់ប្រជាពលរដ្ឋ និងជ្រើសរើសទីតាំងដែល មិនមានអាជ្ញាបណ្ណឯកជន ដោយមានការចូលរួមពីលោកមន្ទីរអភិវឌ្ឍន៍ ជនបទ និងប្រធានមន្ទីរឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្ត នៅសាលប្រជុំសាលាខេត្តព្រះវិហារ នាព្រឹកថ្ងៃទី២៣ ខែមិថុនា ឆ្នាំ២០២៦។

#រដ្ឋបាលខេត្តព្រះវិហារ

រដ្ឋបាលខេត្តព្រះវិហារ សូមជម្រាបជូនសាធារណជនឱ្យបានជ្រាបថា៖ កាលពីយប់​ ថ្ងៃទី២២​ ខែមិថុនា​ ឆ្នាំ២០២៦​ គណនីបណ្តាញសង្គមឈ្មោះ «ប៉ាន ព័ត៌មាន» បានបង្ហោះរៀបរាប់អំពីមូលហេតុ​ដែលលោកមិនបានចូលខ្លួនដាក់ពាក្យបណ្តឹង​ និងបានឆ្លេីយតបចំពោះសេចក្តីប្រកាសព័ត៌មានរបស់រដ្ឋបាលខេត្តព្រះវិហារ។

ជាការឆ្លេីយតប​ រដ្ឋបាលខេត្ត​ព្រះវិហារ សូមឲ្យម្ចាស់គណនីបណ្តាញសង្គមឈ្មោះ «ប៉ាន ព័ត៌មាន»​ ចូលខ្លួនមកបំភ្លឺ​ និងដាក់ពាក្យបណ្តឹង​នៅស្នងការដ្ឋាននគរបាលខេត្តព្រះវិហារ​ ដោយទំនាក់ទំនងជាមួយលោកឧត្តមសេនីយ៍ត្រី​ ឆយ បូរិន ស្នងការរង និងជាប្រធានសេនាធិការដ្ឋាន នៃស្នងការដ្ឋានគរបាខេត្តព្រះវិហារ​ លេខទំនាក់ទំនង​ 097 504 6504។

សូមសាធារណជន ជ្រាបជាព័ត៌មានតាមការគួរ។

រដ្ឋបាលខេត្តព្រះវិហារ ចេញសេចក្តីប្រកាសព័ត៌មានបញ្ជាក់ថាពុំមែនជាករណីប៉ុនប៉ងមនុស្សឃាត ឬបង្កអសន្តិសុខតាមដងផ្លូវដូចការចុះផ្សាយនោះឡើយ ពោល គឺជាករណីទំនាស់បុគ្គល និងបុគ្គល

សេចក្តីប្រកាសនេះធ្វើឡើងបន្ទាប់ពីមានករណីបណ្តាញសង្គមមួយឈ្មោះ «ប៉ាន ព័ត៌មាន» បានបង្ហោះវីដេអូរយៈពេលជាង ១ នាទី និងខ្លឹមសារថា មានក្រុមជនមិនស្គាល់មុខប្រមាណ ៤ នាក់ ជិះរថយន្តម៉ាក Highlander ពណ៌ខ្មៅ គ្មានស្លាកលេខ បានដេញបុក ស្ទាក់ផ្លូវ និងគំរាមកំហែងរូបលោក ដែលជាអ្នកសារព័ត៌មាន រួមទាំងបានវាយរថយន្តរបស់លោកចំនួន ១ ដៃផងដែរ ដែលបានកើតឡើងនៅក្នុងភូមិសាស្ត្រភូមិណារ៉ុង ឃុំឆែបពីរ ស្រុកឆែប ខេត្តព្រះវិហារ កាលពីវេលាម៉ោង ៤:១១ នាទីរសៀល ថ្ងៃទី២០ ខែមិថុនា ឆ្នាំ២០២៦។

កម្លាំងជំនាញនៃស្នងការដ្ឋាននគរបាលខេត្តព្រះវិហារ សហការជាមួយអធិការដ្ឋាននគរបាលស្រុកឆែប និងប៉ុស្តិ៍នគរបាលរដ្ឋបាលឃុំឆែបពីរ បានចុះស្រាវជ្រាវ យ៉ាងម៉ត់ចត់ជាបន្ទាន់ ជាលទ្ធផលគឺពុំមែនជាករណីពុំមែនជាករណីប៉ុនប៉ងមនុស្សឃាត ឬបង្កអសន្តិសុខតាមដងផ្លូវដូចការចុះផ្សាយនោះឡើយ ពោលគឺជាករណីទំនាស់បុគ្គល និងបុគ្គល។

បច្ចុប្បន្នកម្លាំងសមត្ថកិច្ចកំពុងបន្តនីតិវិធីស្រាវជ្រាវ និងស៊ើបអង្កេតករណីនេះឱ្យបានដិតដល់ដើម្បីចាត់ការតាមច្បាប់ ហើយរដ្ឋបាលខេត្តនឹងជម្រាបជូនព័ត៌មានលម្អិតបន្ថែមទៀត នៅពេលទទួលបានលទ្ធផលថ្មី។

សូមសាធារណជន ជ្រាបជាព័ត៌មានតាមការគួរ។

ខ្ញុំបានឆ្លៀតជជែកគ្នាក្រៅផ្លូវការជាមួយ ឯកឧត្តម Anutin Charnvirakul នាយករដ្ឋមន្ត្រីថៃ នៅទីក្រុងកាហ្សាន, សហព័ន្ធរុស្សី។ ខ្ញុំបានលើកឡើងនូវចំណុចមួយចំនួនពាក់ព័ន្ធនឹងជំហររបស់កម្ពុជាក្នុងការដោះស្រាយបញ្ហាព្រំដែនកម្ពុជា-ថៃ ៖

១. កម្ពុជាប្រកាន់ជំហរដោះស្រាយបញ្ហាព្រំដែនជាមួយថៃ ដោយសន្តិវិធី និងស្របតាមច្បាប់អន្តរជាតិ។

២. ពាក់ព័ន្ធនឹងព្រំដែនសមុទ្ទ គឺសូមភាគីទាំងពីរបន្តដោះស្រាយ តាមរយៈយន្តការ Compulsory Conciliation ក្រោម UNCLOS ដែលបាននិងកំពុងដំណើរការ។

៣. ពាក់ព័ន្ធនឹងព្រំដែនគោក កម្ពុជាមកដល់ពេលនេះ នៅតែជ្រើសរើសយកការដោះស្រាយតាមយន្តការទ្វេភាគីដែលមានស្រាប់គឺ JBC និងផ្អែកលើកិច្ចព្រមព្រៀងដែលមានស្រាប់។ ប៉ុនែ្តកម្ពុជាជំរុញអោយភាគីថៃរៀបចំតែងតាំងប្រធានJBC ថៃ និងជំរុញអោយចាប់ផ្តើមដំណើរការចុះវាស់វែង និងខ័ណ្ឌសីមាព្រំដែនអោយបានឆាប់ ស្របតាមស្មារតីនៃសេចក្តីប្រកាសរួមថ្ងៃ ២៧ ធ្នូ ២០២៥ ចំណុចទី៣ ដែលភាគីទាំងពីរបានចុះហត្ថលេខា។

៤. ពាក់ព័ន្ធនឹងការបើកច្រកព្រំដែនគោក មិនមានការចាំបាច់ក្នុងការជជែកគ្នាក្នុងពេលនេះទេ។

I had an informal chat with Thai Prime Minister Anutin Charnvirakul in Kazan, Russian Federation. I reiterated Cambodia's position related to Cambodia-Thailand border issue:

1. Cambodia adheres to peaceful resolution in accordance with international law regarding border issue with Thailand.

2. Regarding maritime border, both sides should continue to proceed with Compulsory Conciliation under UNCLOS, which both Cambodia and Thailand are already engaged in.

3. Regarding land border, up until now Cambodia still chooses existing bilateral mechanism, which is the Joint Boundary Commission (JBC), in accordance with existing agreements. However, Cambodia urges Thailand to appoint its JBC chief and to begin joint survey and demarcation works as soon as possible, in accordance with Joint Statement of 27 December 2025, Point #3, which both Cambodia and Thailand signed.

4. Regarding the opening of land border, no need to talk at this time.

#ហ៊ុនម៉ាណែត
#កម្ពុជា

ឯកឧត្តម គីម រិទ្ធី អភិបាលខេត្តព្រះវិហារ បានអញ្ជើញដឹកនាំកិច្ចប្រជុំគណៈអភិបាលខេត្តព្រះវិហារ ដើម្បីពិភាក្សាលើការងារតែងតាំងមន្ត្រីរាជការ ស្តាប់របាយកាណ៍ វឌ្ឍនភាពការងារ និងបញ្ហាប្រឈម នៅសាលប្រជុំសាលាខេត្តព្រះវិហារ។

១៩ មិថុនា ២០២៦

#រដ្ឋបាលខេត្តព្រះវិហារ

ក្រសួងបរិស្ថាន សហការជាមួយរដ្ឋបាលខេត្តព្រះវិហារ រៀបចំពិធីអបអរសាទរយុទ្ធនាការ សំអាតផ្លូវជាតិ ក្រោមប្រធានបទ "ផ្លូវជាតិគ្មានសំរាមផ្លាស្ទិក" ក្រោមអធិបតីភាព លោកជំទាវ ឃឹមភុន កេសរ អនុរដ្ឋលេខាធិការក្រសួងបរិស្ថាន តំណាងដ៏ខ្ពង់ខ្ពស់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ឯកឧត្តម គីម រិទ្ធី អភិបាលខេត្តព្រះវិហារ និងមានការចូលរួមឯកឧត្តម ឡេង ជីវិន អគ្គនាយក នៃអគ្គនាយកដ្ឋានចំណេះដឹង និងព័ត៌មានបរិស្ថានអភិបាលរងខេត្ត លោកមេបញ្ជាការកងកម្លាំងទាំងបី លោក លោកស្រីប្រធានមន្ទីរ អង្គភាពជុំវិញខេត្ត មន្រ្តីរាជការ សិស្សានុសិស្ស យុវជន និងជាប្រជាពលរដ្ឋ នៅបរិវេណសាលាខេត្តព្រះវិហារ។

យុទ្ធនាការនេះ រៀបចំឡើងក្នុងគោលបំណងដាស់តឿន និងបំផុសស្មារតី ជំរុញឱ្យប្រជាពលរដ្ឋគ្រប់រូប ចូលរួមស្រឡាញ់ និងថែរក្សាអនាម័យបរិស្ថាន តាមរយៈការកាត់បន្ថយ និងការមិនបោះចោលកាកសំណល់ប្លាស្ទិកពាសវាលពាសកាល
រួមគ្នាកសាងដងផ្លូវជាតិ ឱ្យមានភាពបៃតង ស្អាត និងគ្មានការបំពុល ដើម្បីស្វាគមន៍ភ្ញៀវទេសចរជាតិ និងអន្តរជាតិ ដែលមកកម្សាន្តនៅក្នុងទឹកដីប្រវត្តិសាស្ត្រខេត្តព្រះវិហារ។

១៩ មិថុនា ២០២៦

រដ្ឋបាលខេត្តព្រះវិហារ​ ផ្ញេីរសារលិខិតថ្វាយព្រះពរ​ សូមក្រាបបង្គំទូលថ្វាយ​ សម្ដេចព្រះមហាក្សត្រី​ នរោត្តម​ មុនិនាថ​ សីហនុ​ ព្រះវររាជមាតាជាតិខ្មែរ​ ក្នុងឱកាសនៃព្រះរាជពិធីបុណ្យ​ ចម្រេីនព្រះជន្ម​គម្រប់​ ៩០វស្សា​ យាងចូល​ ៩១ព្រះវស្សា។

ក្នុងឱកាសដ៏មហានក្ខត្តឫក្សឧត្ដុង្គឧត្តមនេះ ទូលព្រះបង្គំ សូមលើកហត្ថប្រណម្យបួងសួងដល់គុណបុណ្យ ព្រះរតនត្រ័យ វត្ថុស័ក្តិសិទ្ធិទាំងឡាយក្នុងលោក និងទេវតារក្សាព្រះមហាស្វរច្ឆត្រ ព្រមទាំង
ទេវតាឆ្នាំថ្មីព្រះនាម រាក្យទេវី សូមជួយប្រោះព្រំសព្ទសាធុការពរ បវរមហាប្រសើរថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គបានប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ដើម្បីគង់ជាម្លប់ដ៏ត្រជាក់ត្រជុំសម្រាប់ប្រជារាស្ត្រខ្មែរ ជានិច្ចនិរន្តរ៍តរៀងទៅ។

លោកជំទាវបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងប្រតិភូ បានអញ្ជើញចុះសួរសុខទុក្ខ និងនាំយកអំណោយមកប្រគល់ជូនវិរកងទ័ពជួរមុខ កងពលតូចអន្តរាគមន៍លេខ ៩ ទិសមុំបី នៅបរិវេណសាលាខេត្តព្រះវិហារ។

ឆ្លៀតក្នុងឱកាសនោះដែរ លោកជំទាវបណ្ឌិត ក៏បានអញ្ជើញចុះសួរសុខទុក្ខដោយផ្ទាល់ ដល់បងប្អូនប្រជាពលរដ្ឋភៀសសឹក ដែលកំពុងស្នាក់នៅមណ្ឌលបណ្ដោះអាសន្ន ស្ថិតនៅ ភូមិតាកឹងបៃតង ឃុំថ្មី ស្រុកគូលែន ខេត្តព្រះវិហារ។

ជាមួយគ្នានោះ ឯកឧត្តមអភិបាលខេត្ត ក៏បានថ្លែងអំណរគុណយ៉ាងជ្រាលជ្រៅ ចំពោះការចំណាយពេលវេលាដ៏មមាញឹក របស់លោកជំទាវបណ្ឌិត ដែលបញ្ជាក់ឲ្យឃើញថា ថ្នាក់ដឹកនាំតែងតែយកចិត្តទុកដាក់ និងគិតគូរដល់សុខទុក្ខបងប្អូនវីរកងទ័ពដែលកំពុងលះបង់កម្លាំងកាយចិត្ត បំពេញភារកិច្ចការពារបូរណភាពទឹកដី នៅតាមបន្ទាត់ព្រំដែន។

១៥ មិថុនា ២០២៦

#រដ្ឋបាលខេត្តព្រះវិហារ

ឯកឧត្តម គីម រិទ្ធី អភិបាលខេត្តព្រះវិហារ អញ្ជើញជាអធិបតីភាពក្នុងពិធីអបអរសាទរទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី ៩ ឆ្នាំ២០២៦ ក្រោមប្រធានបទ "TVET" ផ្តល់ជំនាញ ការងារ និងប្រាក់ចំណូល នៅវិទ្យាស្ថានបណ្ដុះបណ្ដាលវិជ្ជាជីវៈ ខេត្តព្រះវិហារ។

ក្នុងពិធីនោះដែរ ឯកឧត្តមអភិបាលខេត្ត បានលើកទឹកចិត្តដល់ប្អូនៗសិស្សានុសិស្ស យុវជន និងប្រជាពលរដ្ឋក្នុងខេត្តទាំងមូល ឱ្យងាកមកចាប់អារម្មណ៍ និងចុះឈ្មោះចូលរៀនជំនាញបច្ចេកទេសឱ្យបានច្រើនកុះករ។ ឯកឧត្តមបានសង្កត់ធ្ងន់ថា រដ្ឋបាលខេត្តនឹងបន្តជំរុញ និងសហការជាមួយគ្រប់វិស័យឯកជន ដើម្បីបង្កើតឱកាសការងារក្នុងស្រុក ធានាថាប្អូនៗដែលរៀនចប់ជំនាញពីវិទ្យាស្ថានពហុបច្ចេកទេសខេត្ត នឹងមានការងារធ្វើ និងមានប្រាក់ចំណូលជាក់ស្តែង ស្របតាមយុទ្ធសាស្ត្រដ៏ខ្ពង់ខ្ពស់របស់សម្តេចធិបតីនាយករដ្ឋមន្ត្រី។

១៥ មិថុនា ២០២៦
#រដ្ឋបាលខេត្តព្រះវិហារ