ក្រុមប្រឹក្សាសកម្មភាពជនពិការ Disability Action Council

សិក្ខាសាលាផ្សព្វផ្សាយស្តីពីការលើកកម្ពស់សមភាពយេនឌ័រ បរិយាបន្នពិការភាព និងការប្រយុទ្ធប្រឆាំងនិងជំងឺអេដស៍ ក្នុងវិស័យឧស្សាហកម្ម វិទ្យាសាស្ត្រ និងនវានុវត្តន៍

សណ្ឋាគារសុខាភ្នំពេញ៖ នៅរសៀលថ្ងៃទី២៥ ខែមិថុនា ឆ្នាំ២០២៦ ដោយមានការអនុញ្ញាតពី ឯកឧត្តម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការ មន្ត្រីបច្ចេកទេស ២រូប នៃអគ្គលេខាធិការដ្ឋាន ក.ស.ជ. បានចូលរួមនិងធ្វើបទបង្ហាញស្ដីពីផែនការយុទ្ធសាស្រ្តជាតិស្ដពីពិការភាពឆ្នាំ២០២៤-២០២៨ ក្នុងសិក្ខាសាលាផ្សព្វផ្សាយស្តីពីការលើកកម្ពស់សមភាពយេនឌ័រ បរិយាបន្នពិការភាព និងការប្រយុទ្ធប្រឆាំងនិងជំងឺអេដស៍ ក្នុងវិស័យឧស្សាហកម្ម វិទ្យាសាស្ត្រ និងនវានុវត្តន៍ នៅសណ្ឋាគារសុខា រាជធានីភ្នំពេញ ក្រោមអធិបតីភាព លោកជំទាវ ឡាយ ណាវីន រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ និងនវានុវត្តន៍។

សិក្ខាសាលានេះរៀបចំដោយ ក្រសួងឧស្សាហកម្ម វិទ្យាសាស្ត្រ និងនវានុវត្តន៍ មានគោលបំណង ដើម្បីផ្សព្វផ្សាយនូវផែនការយុទ្ធសាស្ត្រ សមភាពយេនឌ័រ ព្រមទាំងគោលនយោបាយ និងវិធានការ ឆ្លើយតបនឹងមេរោគអេដស៍និងជំងឺអេដស៍ ដោយមានការអញ្ជើញចូលរួមពីថ្នាក់ដឹកនាំ មន្ត្រីរាជការនៃក្រសួងឧស្សាហកម្ម វិទ្យាសាស្ត្រ និងនវានុវត្តន៍ និងម្ចាស់សហគ្រិន និងអ្នកពាក់ព័ន្ធ សរុបចំនួនប្រមាណ ២០០នាក់៕

កិច្ចប្រជុំបូកសរុបលទ្ធផលការងារប្រចាំឆមាសទី១ ពិនិត្យវឌ្ឍនភាពការងារ និងទិសដៅបន្តឆមាសទី២!

រាជធានីភ្នំពេញ៖ នាព្រឹកថ្ងៃព្រហស្បតិ៍ ១១កើត ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៥ ខែមិថុនា ឆ្នាំ២០២៦ ឯកឧត្តម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការ និងជាទីប្រឹក្សាក្រុមប្រឹក្សាភិបាលសមាគមជនមានពិការភាពហង់សិននៅកម្ពុជា បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំឆមាសទី១ ពិនិត្យវឌ្ឍនភាពការងារ និងទិសដៅបន្ត ដែលរៀបចំឡើងដោយសមាគមជនមានពិការភាពហង់សិននៅកម្ពុជា ដែលមាន ថ្នាក់ដឹកនាំសមាគមចំនួន២០នាក់ (ស្រី ៣នាក់) នៅទីស្នាក់ការសមាគម ក្នុងមជ្ឈមណ្ឌលស្តារលទ្ធភាពពលកម្មជនពិការគៀនឃ្លាំង៕

កម្មវិធីកិច្ចសន្ទនារវាងអ្នករៀចំគោលនយោបាយ និងអង្គការតំណាងជនពិការ ក្រោមប្រធានបទ «តួនាទីរបស់អង្គការតំណាងជនពិការ និងការចូលរួមចំណែកក្នុងការអនុវត្តកម្មវិធីគាំពារសង្គមនៅថ្នាក់ក្រោមជាតិ»

រាជធានីភ្នំពេញ៖ ព្រឹកថ្ងៃទី២៣ ខែមិថុនា ឆ្នាំ២០២៦ ដោយមានការអនុញ្ញាតិពី ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្ដម ស្រី ចាន់ អគ្គលេខាធិការរង តំណាង ឯកឧត្តម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការ បានចូលរួមជាគណៈអធិបតីក្នុងកម្មវិធីកិច្ចសន្ទនារវាងអ្នករៀចំគោលនយោបាយ និងអង្គការតំណាងជនពិការ ក្រោមប្រធានបទ «តួនាទីរបស់អង្គការតំណាងជនពិការ និងការចូលរួមចំណែកក្នុងការអនុវត្តកម្មវិធីគាំពារសង្គមនៅថ្នាក់ក្រោមជាតិ» ក្រោមអធិបតីភាពដ៏ខ្ពង់ខ្ពស់ ឯកឧត្ដម សំហេង បុរស រដ្ឋមន្ត្រីប្រតិភូអមនាយករដ្ឋមន្ត្រី នៅសណ្ឋាគារកាំបូឌីយ៉ាណា។

កម្មវិធីកិច្ចសន្ទនានេះរៀបចំដោយអង្គការជនពិការកម្ពុជា និងមានការចូលរួមពី ឯកឧត្ដម លោកជំទាវ លោក លោកស្រី តំណាងក្រសួង ស្ថាប័ន អង្គការពាក់ព័ន្ធសរុបចំនួនប្រមាណ ១០៩នាក់។ កម្មវិធីនេះ រៀបចំឡើងក្នុងគោលបំណងពង្រឹងការយល់ដឹងលើការគ្រប់គ្រង និងការពិនិត្យថវិកាសេវាសង្គមថ្នាក់ក្រោមជាតិ ទន្ទឹមនឹងការជំរុញការយល់ដឹងអំពីនីតិវិធីនៃការសុំប័ណ្ណសម្គាល់ពិការភាព និងការទទួលបានអត្ថប្រយោជន៍គាំពារសង្គម ពីកម្មវិធីកញ្ចប់គ្រួសារ។

ថ្លែងក្នុងឱកាសនោះ ឯកឧត្ដម បានលើកឡើងថា អង្គការតំណាងជនពិការមានតួនាទីជាសំឡេងតំណាងឱ្យជនមានពិការភាពក្នុងការបង្ហាញតម្រូវការ បញ្ហាប្រឈម និងដំណោះស្រាយជាក់ស្តែង។ ជាដៃគូសំខាន់ក្នុងការផ្សព្វផ្សាយព័ត៌មានអំពីកម្មវិធីគាំពារសង្គមដល់សហគមន៍។ ចូលរួមតាមដាន វាយតម្លៃ និងផ្តល់មតិយោបល់លើការអនុវត្តកម្មវិធីគាំពារសង្គមនៅមូលដ្ឋាន។ ក្នុងកម្មវិធីនេះដែល ឯកឧត្ដម សូមគាំទ្រយ៉ាងពេញទំហឹងចំពោះការពង្រឹងតួនាទីរបស់អង្គការតំណាងជនពិការ និងការចូលរួមប្រកបដោយអត្ថន័យក្នុងការអនុវត្តកម្មវិធីគាំពារសង្គមនៅថ្នាក់ក្រោមជាតិ ដើម្បីធានាថា ជនមានពិការភាពទទួលបានការការពារ ការគាំទ្រ និងឱកាសស្មើភាពក្នុងការអភិវឌ្ឍសង្គមប្រកបដោយបរិយាបន្ន និងចីរភាព៕

សិក្ខាសាលាពិគ្រោះយោបល់រវាងអ្នកបង្កើតគោលនយោបាយ និងតំណាងអង្គការជនមានពិការភាព ក្រោមប្រធានបទ៖ «ការទទួលបាន និងការគាំទ្រលើឧបករណ៍ជំនួយ និងបច្ចេកវិទ្យាសម្រាប់ជនមានពិការភាព»

រាជធានីភ្នំពេញ៖ ព្រឹកថ្ងៃទី១៩ ខែមិថុនា ឆ្នាំ២០២៦ ដោយមានការអនុញ្ញាតិពីឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ឯកឧត្ដម ឌិន បូរី អនុរដ្ឋលេខាធិការ តំណាងឯកឧត្តម ម៉េត មករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ចូលរួមជាអធិបតីក្នុងកម្មវិធីបើកសិក្ខាសាលាពិគ្រោះយោបល់រវាងអ្នកបង្កើតគោលនយោបាយ និងតំណាងអង្គការជនមានពិការភាព ក្រោមប្រធានបទ៖ «ការទទួលបាន និងការគាំទ្រលើឧបករណ៍ជំនួយ និងបច្ចេកវិទ្យាសម្រាប់ជនមានពិការភាព» នៅសណ្ឋាគារកាំបូឌីយ៉ាណា។

សិក្ខាសាលានេះរៀបចំដោយអង្គការជនពិការកម្ពុជា និងមានការចូលរួមពី ឯកឧត្ដម លោកជំទាវ លោក លោកស្រី តំណាងក្រសួង ស្ថាប័ន អង្គការពាក់ព័ន្ធសរុបចំនួនប្រមាណ ៣៥នាក់ ដែលមានគោលបំណង៖
ទី១. ដើម្បីស្វែងយល់អំពីយន្តការ និងវិធានការគាំទ្រនានា ដែលមានស្រាប់ ឬកំពុងអនុវត្ត ពាក់ព័ន្ធនឹងការផ្តល់ និងការគាំទ្រផ្នែកឧបករណ៍ជំនួយ និងបច្ចេកវិទ្យាសម្រាប់ជនមានពិការភាពនៅកម្ពុជា។
ទី២. ដើម្បីចែករំលែកអំពីបញ្ហាប្រឈម តម្រូវការ និងបទពិសោធន៍ជាក់ស្តែងរបស់ជនមានពិការភាព ក្នុងការទទួលបាន និងប្រើប្រាស់ឧបករណ៍ជំនួយ និងបច្ចេកវិទ្យាជំនួយ ដោយផ្អែកលើប្រភេទ និងស្ថានភាពពិការភាពផ្សេងៗ។
ទី៣. ដើម្បីស្វែងរកដំណោះស្រាយរួម និងបង្កើនកិច្ចសហការរវាងអ្នកបង្កើតគោលនយោបាយ អង្គការជនមានពិការភាព និងភាគីពាក់ព័ន្ធនានា ក្នុងការរៀបចំ និងអនុវត្តវិធានការដែលអាចឆ្លើយតបទៅនឹងតម្រូវការជាក់ស្តែងរបស់ជនមានពិការភាពប្រកបដោយប្រសិទ្ធភាព និងបរិយាបន្ន។

ថ្លែងក្នុងឱកាសនោះ ឯកឧត្ដម បានលើឡើងថា ការធានាការទទួលបានបច្ចេកវិទ្យាជំនួយ គឺជាការវិនិយោគមួយដ៏សំខាន់ និងជាសសរស្តម្ភនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលដែលជាការឆ្លើយតបទៅនឹងគោលការណ៍ «មិនទុកនរណាម្នាក់ចោល» ដូចមានចែងក្នុងក្របខណ្ឌគោលដៅអភិវឌ្ឍន៍ប្រកបដោយចីរភាពកម្ពុជា (CSDG) ផងដែរ។ តាមរយៈការផ្តល់ឧបករណ៍ជំនួយប្រកបដោយគុណភាព យើងកំពុងចូលរួមចំណែក សម្រេចបាននូវចក្ខុវិស័យប្រទេសកម្ពុជាជាប្រទេស មានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេស មានចំណូលកម្រិតខ្ពស់នៅឆ្នាំ២០៥០ ប្រកបដោយបរិយាបន្ន។ បច្ចេកវិទ្យាជំនួយមិនមែនជាវត្ថុប្រណិតទេ ប៉ុន្តែជាតម្រូវការមូលដ្ឋាននិងកត្តាគន្លឹះសម្រាប់ជនមានពិការភាព អាចទទួលបាននូវការអប់រំ ការងារសេវាសុខភាព និងការចូលរួមពេញលេញក្នុងសង្គម បើគ្មានឧបករណ៍ជំនួយដែលសមស្របទេ ជនមានពិការភាពនឹងត្រូវប្រឈមនឹងឧបសគ្គយ៉ាងធ្ងន់ធ្ងរក្នុងការបំពេញសក្តានុពលរបស់ខ្លួន៕

សារលិខិតថ្វាយព្រះពរ
សូមព្រះបរមរាជានុញ្ញាតក្រាបបង្គំទូលថ្វាយ
សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខែ្មរ ក្នុងសេរីភាព សេចក្ដីថ្លៃថ្នូរ និងសុភមង្គល ក្នុងព្រះបរមរាជវរោកាសចម្រើនព្រះជន្ទ បរពិតសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត!

ទីស្តីការក្រសួង÷ ដោយមានការចាត់តាំងពី ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា នៅព្រឹកថ្ងៃទី១៧ ខែមិថុនា ឆ្នាំ២០២៦ ឯកឧត្តម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការ បានដឹកនាំកិច្ចប្រជុំ ជាមួយឯកឧត្តម ខុម ផលលឿន នាយកមូលនិធិជនពិការនិងមន្រ្តីជំនាញ លោក សាន់ រតនា ប្រធាននាយកដ្ឋានសុខមាលភាពជនពិការជាតំណាងអគ្គនាយកស្តារសម្បទា ថ្នាក់ដឹកនាំ និងមន្ត្រីជំនាញ របស់អគ្គលេខាធិការក្រុមប្រឹក្សាជនពិការ ដើម្បីរៀបចំជំនួយស្មារតីឆ្លើយតបទៅនឹងសំណូមពរតាមរយៈលិខិតរបស់តំណាងគណៈបក្សបំណងពលរដ្ឋ ដែលបានដាក់ជូនសម្តេចធិបតី នាយករដ្ឋមន្រ្តីអំពីស្ថានភាពជនមានពិការភាពទាំង ៧ចំណុចដូចខាងក្រោម÷

១. ក្រសួងសង្គមកិច្ច អតីតយុទ្ធជន និងយុវនីតិសម្បទា (ស.អ.យ.) គួររៀបចំបន្ទប់ជួល និងផ្ទះជួលក្នុងតម្លៃសមរម្យឬទីសំណាក់រួមដោយឥតគិតថ្លៃប្រកបដោយសុវត្ថិភាពនៅតាមរាជធានី-ខេត្ត សម្រាប់ជនមានពិការភាពដែលគ្មានផ្ទះសម្បែង ចៀសវាងការដេកតាមសំយាបផ្ទះអ្នកស្រុក, ក្បែរវត្តអារាម, អគារទ្រុឌទ្រោម ឬទីសាធារណះហាលភ្លៀងហាលខ្យល់និងប្រឈមហានិភ័យផ្សេងៗ។
២. ក្រសួងសង្គមកិច្ចគួរបង្កើនការផ្តល់ប័ណ្ណមូលនិធិសមធម៌ ឬប័ណ្ណ ប.ស.ស. ដល់ជនមានពិការភាពទទួលបាន ការពិនិត្យ និងព្យាបាលជំងឺដោយឥតគិតថ្លៃ។
៣. ក្រសួងសង្គមកិច្ច គួរបង្កើត និងពង្រីកមជ្ឈមណ្ឌលស្តារលទ្ធភាពលទ្ធកម្មកាយសម្បទារាជធានី-ខេត្ត
ព្រមទាំងបើកវគ្គបណ្តុះបណ្តាលជំនាញដល់ជនមានពិការភាពអាចរៀនបានមានជាងជួសជុលទូរស័ព្ទ និងកុំព្យូទ័រ, ការងារសិប្បកម្ម ឬជំនាញផ្នែកលក់ដូរតាមប្រព័ន្ធបច្ចេកវិទ្យាដើម្បីពួកគាត់អាចរកចំណូលដោយខ្លួនឯង។
៤. ក្រសួងសង្គមកិច្ច គួរផ្តល់រទេះរុញ, ជើងសិប្បនិម្មិត, ឈើច្រត់ ឬឧបករណ៍ជាតម្រូវការប្រើប្រាស់ផ្ទាល់ខ្លួនរបស់ជនមានពិការភាពដោយឥតគិតថ្លៃ និងមានគុណភាព។
៥. ក្រសួងសង្គមកិច្ច គួរសហការជាមួយអាជ្ញាធររាជធានី-ខេត្ត-ក្រុង ចុះពិនិត្យ រៀបចំសណ្តាប់ធ្នាប់ និងអប់រំ អំពីរបៀបរបបនៃការរស់នៅស្អាត មានអនាម័យ និងការថែទាំសុខភាព ជាពិសេសជនមានពិការភាពដែលគ្មានផ្ទះសម្បែង រស់នៅអនាថា។
៦. រាជរដ្ឋាភិបាល ត្រូវលើកកម្ពស់សិទ្ធិ និងផ្ដល់ឱកាសការងារសម្រាប់ជនមានពិការភាពក្នុងអត្រាកំណត់ ដោយសា្ថប័នរដ្ឋ ២% និងវិស័យឯកជន ១% ឱ្យមាន ប្រសិទ្ធភាព អនុលោមតាមច្បាប់ស្តីពីកិច្ចការពារ និងលើកកម្ពស់សិទ្ធិជនពិការនិងអនុក្រឹត្យលេខ ១០៨។
៧. រាជរដ្ឋាភិបាល ត្រូវបន្តតាមដាន ពិនិត្យ និងជំរុញម្ចាស់សហគ្រាសក្នុងវិស័យឯកជនឱ្យទទួលយកបុគ្គលិកជាជនមានពិការភាពអាស្រ័យលើសមត្ថភាព, ចំណេះដឹងជំនាញតាមច្បាប់កំណត់។

ជនបង្គោលមកពីទាំង២៥រាជធានី ខេត្ត ទទួលបានការបណ្តុះបណ្តាលរំលឹកស្តីពីការប្រើប្រាស់ថ្នាលតាមដាន និងវាយតម្លៃការអនុវត្ត ផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨

រាជធានីភ្នំពេញ៖ ថ្ងៃពុធ ៣កើត ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹង ថ្ងៃទី១៧ ខែមិថុនា ឆ្នាំ២០២៦ ដោយមានការអនុញ្ញាតដ៏ខ្ពង់ខ្ពស់ពី ឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ ឯកឧត្តម អ៊ុង សម្បត្តិ អគ្គលេខាធិការនិងជាសមាជិកអចិន្ត្រៃយ៍ក្រុមប្រឹក្សាសកម្មភាពជនពិការ អញ្ជើញជាអធិបតីក្នុងពិធីបើកវគ្គបណ្តុះបណ្តាលរំលឹកស្តីពី ការប្រើប្រាស់ថ្នាលតាមដាន និងវាយតម្លៃការអនុវត្ត ផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨ ជូនជនបង្គោលមកពីរាជធានី ខេត្ត ទាំង២៥ តាមប្រព័ន្ធ zoom។

វគ្គបណ្តុះបណ្តាលនេះមានការចូលរួមពីលោក សុង សិទ្ធិ តំណាង UNDP ឯកឧត្តម លោកជំទាវ លោក លោកស្រី ដែលជាជនបង្គោលមកពីរាជធានី ខេត្ត ក្រុមការងារបច្ចេកទេសនៃអគ្គលេខាធិការដ្ឋានក្រុមប្រឹក្សាសកម្មភាពជនពិការចំនួន ៦៣នាក់ (ស្រី ១៨នាក់ ជនមានពិការភាព ៦នាក់)។

វគ្គបណ្ដុះបណ្ដាលនេះសហការរៀបចំដោយអគ្គលេខាធិការដ្ឋានក្រុមប្រឹក្សាសកម្មភាពជនពិការនិងកម្មវិធីអភិវឌ្ឍន៍សហប្រជាជាតិ (UNDP) ក្នុងគោលបំណងដើម្បីបង្កើនការយល់ដឹងទូលំទូលាយអំពី ផែនការយុទ្ធសាស្ដ្រជាតិស្ដីពីពិការភាពឆ្នាំ២០២៤-២០២៨ (National Disability Strategic Plan 2024-2028) ជាពិសេសផ្ដោតលើសូចនាករនានាដែលពាក់ព័ន្ធនឹងការងារមន្ទីរ អង្គភាព ជុំវិញរាជធានី ខេត្ត ក៏ដូចគ្នាអំពីរបៀបអនុវត្តជាក់ស្តែងនៅក្នុងការប្រើប្រាស់ថ្នាលតាមដាននិងវាយតម្លៃឌីជីថលឱ្យមានប្រសិទ្ធភាព៕

អបអរសាទរទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ លើកទី៩ ឆ្នាំ២០២៦ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល»

រាជធានីភ្នំពេញ÷ ព្រឹកថ្ងៃចន្ទ ទី១៥ មិថុនា ២០២៦ តាមការណែនាំនិងចង្អុលបង្ហាញពីសំណាក់ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ អគ្គលេខាធិការដ្ឋានក្រុមប្រឹក្សាកម្មភាពជនពិការ មូលនិធិជនពិការ និងវិទ្យាស្ថានជាតិសង្គមកិច្ច បានរួមគ្នាដាក់តាំងសមិទ្ធផលការងារសំខាន់ៗរបស់អង្គភាពនីមួយៗ នៅក្នុងពិធីអបអរសាទរទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ លើកទី៩ ឆ្នាំ២០២៦ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល» ក្រោមអធិបតីភាពដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅមជ្ឈមណ្ឌលសន្និបាត និងពិព័រណ៍កោះពេជ្រ។

ទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈ ត្រូវបានបង្កើតឡើងដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈ និងធ្វើការ ផ្សព្វផ្សាយ ទៅដល់សិស្សានុសិស្ស និស្សិត យុវជន មាតាបិតា អាណាព្យាបាល កម្មករនិយោជិត និយោជក និងវិស័យឯកជន ព្រមទាំងសាធារណជនឱ្យបានយល់ដឹងកាន់តែច្បាស់អំពីសារៈសំខាន់នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងការអភិវឌ្ឍកម្លាំងពលកម្មជំនាញប្រកបដោយគុណភាព និងប្រសិទ្ធភាព ដើម្បីឆ្លើយតបទៅនឹងតម្រូវការទីផ្សារការងារទាំងនៅក្នុងប្រទេស និងក្រៅប្រទេស៕

កិច្ចប្រជុំបូកសរុបសមិទ្ធផលការងារនិងទិសដៅបន្ត “គម្រោងលើកកម្ពស់សុខភាពបរិយាបន្នពិការភាព នៅស្រុកអង្គស្នួល ខេត្តកណ្តាល ប្រទេសកម្ពុជា ដំណាក់កាលទី២”

រាជធានីភ្នំពេញ៖ ព្រឹកថ្ងៃសុក្រ ១២រោច ខែជេស្ឋ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១២ ខែមិថុនា ឆ្នាំ២០២៦ ដោយមានការចាត់តាំងពីឯកឧត្ដម អ៊ុង សម្បត្តិ អគ្គលេខាធិការក្រុមប្រឹក្សាសកម្មភាពជនពិការ ឯកឧត្ដម នេត អ៊ុន អគ្គលេខាធិការរង បានអញ្ជើញជាអធិបតីក្នុងពិធីបើកកិច្ចប្រជុំបូកសរុបសមិទ្ធផលការងារនិងទិសដៅបន្ត“គម្រោងលើកកម្ពស់សុខភាពបរិយាបន្នពិការភាព នៅស្រុកអង្គស្នួល ខេត្តកណ្តាល ប្រទេសកម្ពុជា ដំណាក់កាលទី២” នៅ Oakwood Premier Phnom Penh (One Park, Phnom Penh City Center បឹងកក់) កិច្ចប្រជុំនេះសហការរៀបចំឡើងដោយ អគ្គលេខាធិការដ្ឋានក្រុមប្រឹក្សាសកម្មភាពជនពិការ ជាមួយ អង្គការស្តារសម្បទាអន្តរជាតិកូរ៉េ (RI Korea) ។ ក្នុងសិក្ខាសាលានេះមានការអញ្ចើញចូលរូមពីអ្នកពាក់ព័ន្ធដូចជា អង្គការស្តារសម្បទាអន្តរជាតិកូរ៉េ (RI Korea) មន្ត្រីនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ តំណាងមន្ទីរសុខាភិបាលខេត្តកណ្តាល តំណាងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកណ្តាល តំណាងការិយាល័យស្រុកប្រតិបត្តិ តំណាងមន្ទីរពេទ្យបង្អែកអង្គស្នួល តំណាងមណ្ឌលសុខភាពបែកចាន តំណាងមេភូមិបុរីកម្មករ ភូមិព្រៃទន្លាប់ អង្គការជនពិការកម្ពុជា (CDPO) សរុប២១ នាក់។

កិច្ចប្រជុំនេះមានគោលបំណងដូចខាងក្រោម៖
១. ចែករំលែក និងរៀបចំផ្ទៃក្នុងនូវលទ្ធផលមេរៀន និងដែនកំណត់នៃដំណាក់កាលទី២។
២. កំណត់តួនាទី ទំនួលខុសត្រូវ និងយុទ្ធសាស្ត្រផ្ទេរគម្រោងដែលនឹងបញ្ចប់។
៣. ពង្រឹងប្រព័ន្ធកិច្ចសហប្រតិបត្តិការ ក្នុងចំណោមសុខភាព សុខុមាលភាពសង្គម និងមូលដ្ឋានអង្គការរដ្ឋបាល។
៤. ពិភាក្សាអំពីយុទ្ធសាស្ត្រស្នូល និងផែនការនិរន្តរភាពសម្រាប់ដំណាក់កាលទី៣។

ថ្នាក់ដឹកនាំនិងមន្ត្រីរាជការនៃអគ្គលេខាធិការដ្ឋាន ក.ស.ជ. ផ្ញើរសារជូនពរ ឯកឧត្តម ជា សុមេធី ក្នុងឱកាសថ្ងៃខួបកំណើត ឆ្នាំ២០២៦

រាជធានីភ្នំពេញ÷ ថ្ងៃសុក្រ ទី១២ ខែមិថុនា ឆ្នាំ២០២៦ ថ្នាក់ដឹកនាំនិងមន្ត្រីរាជការនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានផ្ញើរសារជូនពរ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាសកម្មភាពជនពិការ ក្នុងឱកាសដ៏មហានក្ខត្តឫក្ស រីករាយថ្ងៃខួបកំណើត ថ្ងៃទី១៣ ខែមិថុនា ឆ្នាំ២០២៦។