NKST Gwagwalada ABUJA.

Tomahar, Maaci 3
(Vol 6, No 2, Iyange 22)

DE YEREN MO ISHIGH YOU GA

Bibilo: Upasalmi 102:2
"De yeren mo ishigh You sha iyange i mzeiyol wam la ga; ver ato her a mo, sha iyange i me yila yô, rumun mo fese."

Kwagh ka una tser or, nana gema ashe nana nenge a ior mba lun vea nan kpa i lu nan guda ken ishima. Aôndo kpaa or ka nana fa er ngu a nan yô ken akaa a tseren nan cii kpaa ka nan lu a ishimaverenkeghen.

Iserael wa icam ne sha ci u or u kwagh a hembe nan, ican i tser nan je ape nana za kpa a lu ga, sha u nana pase ican i nan sha ishigh ki Ter yô. Gadia mbaihomov kura ve er mba a Ter ga yô, yem a ve uikyangen ken tar u icaa, lu ve er ka asenge yô, man hemba ve gburu gburu.

Hen zum la ve yila Aôndo, kpa A vengese ga, ve vaa a Na, kpa A ungwa ve ga, tsô huan ve! Tsô ve gba zamber a Na er A de yeren ve ishigh Nagh sha iyange i mzeiyol ve ga, vea yila Un yô A rumun fese.

Bee er Ter kera ngu a vese imôngo ga yô. Ken atsan ase ne se yila Ter, A huan ving! Se vaa a Na, kpa A wa zwa ga. Yô se kpaa, se mba zamber a Na ser, A rumun myer wase ne, gayô nyôr se iyol hen tar wase ne.

Msen: Tere, ashie kpishi ka U lu ving kpa U eren tom, yô i lu nahan sha vese kpaa, ken iti i Yesu Kristu. Amen.

Copied

1 Mbakorinte 3 : 1 - 8

1. Kpa mo yô, anmgbianev m fatyô u ôron ne kwagh er ka mbajijingiv nahan ga, kpa lu er mbaiyolov nahan tsô, er anikundanev ken Kristu nahan.

2. Lu sha atumba je m koso ne ye, lu sha kwaghyan u taver ga, gadia ne lu a kuma ga. Hegen je kpaa ne mba a kuma ga,

3. gadia ne mba mbaiyolov heregh di tsô, gadia aluer iwuhe man iyongo vea lu her a ven yô, kera ka mbaiyolov ne lu, man kera ka sha inja i or ne zenden gaa?

4. Gadia aluer orgen nana kaa er: Mo yô, m ngu or u Paulu, shin ugen er: Mo m ngu or u Apolo, yô, kera ka ior tsô ne lu gaa?

5. Apolo ngu di nyi je? Man Paulu yô, ngu di nyi? Ka mbatomov mba i lu tom ve man ne gem ne ne jighjigh ye, sha inja i Ter A ne hanmô wase la.

6. Mo m môôr. Apolo gema ur mngerem, kpa ka Aôndo A ne mvese ye.

7. Nahan un u a môôr la ngu ma kwagh ga, shin un u a ur mngerem la kpaa ga, saa Aôndo u A ne mvese la.

8. Un u a môôr la vea un u a ur mngerem la ka kwagh môm tsô, kpa hanmô ve nana zua a injar i nan iyol i nan sha inja i tom u nan.

Upasalmi 91 : 1 - 5

1. Or u nan tem ken ijiir i yeren i Uhembansha yô, nana tsa ken mure u Uhembanagee cii.

2. Me kaa a TER mer: U ngu ijiir yam i yeren man iyouutya yam, Aôndo wam u m suur sha a We ne.

3. Gadia ka Wen, Una yima u sha kwar u orhônoninyon, sha bouange u timin la ye.

4. Una cir u sha akper a Na, ka ken atô u akper a Na je, ú yer ye; mimi Na ka perutya man akuvautya.

5. Ú kera cia mcieryol u utu mayange ga, shin ivaan i i keren i atetan la kpaa ga