Team TIBAY

𝐋𝐆𝐔 𝐊𝐚𝐩𝐚𝐥𝐨𝐧𝐠 𝐍𝐚𝐠𝐭𝐮𝐫𝐧-𝐎𝐯𝐞𝐫 𝐨𝐠 𝐒𝐞𝐰𝐢𝐧𝐠 𝐌𝐚𝐜𝐡𝐢𝐧𝐞 𝐮𝐠 𝐅𝐨𝐨𝐝 𝐏𝐚𝐜𝐤𝐬 𝐬𝐚 𝐦𝐠𝐚 𝐒𝐋𝐏 𝐁𝐞𝐧𝐞𝐟𝐢𝐜𝐢𝐚𝐫𝐢𝐞𝐬 𝐮𝐠 𝐂𝐚𝐫𝐞𝐠𝐢𝐯𝐞𝐫𝐬 𝐬𝐚 𝐏𝐖𝐃 𝐬𝐚 𝐁𝐚𝐫𝐚𝐧𝐠𝐚𝐲 𝐏𝐚𝐠-𝐚𝐬𝐚

Gipahigayon karong adlawa, Pebrero 26, 2026 ang turn-over sa sewing machine ug food packs sa Barangay Pag-asa, Kapalong, Davao del Norte isip kabahin sa padayon nga programa sa panginabuhian sa lokal nga panggamhanan sa Kapalong pinaagi sa inisyatiba ni Mayor Edgardo L. Timbol.

Ang maong kalihokan gipangunahan sa Municipal Social Welfare and Development Office (MSWDO) ubos sa pagpangulo ni Dr. Mary Grace L. Abuda, RSW, nga nagtumong sa paghatag og dugang nga oportunidad sa panginabuhian alang sa 15 ka benepisyaryo sa Sustainable Livelihood Program (SLP) ug mga caregivers sa Persons with Disabilities (PWDs).

Ang livelihood program nga gipasiugdahan mao ang basahan making o produksyon sa mga panapton nga magamit sa nagkalain-laing panimalay ug establisemento. Pinaagi sa paghatag og sewing machine, gilauman nga mas mapalambo sa mga benepisyaryo ang ilang produksyon ug masustenar ang ilang kita alang sa ilang pamilya.

Kini nga inisyatiba gihimo sa pakigtambayayong sa mga HUMS students gikan sa Kapalong National High School, nga nagpakita og aktibong suporta ug partisipasyon isip kabahin sa ilang community engagement. Dako usab ang pasalamat sa LGU ngadto kang Ms. Nonite Orito, HUMS Program Coordinator sa KNHS, sa iyang bug-os nga suporta ug koordinasyon sa maong kalihokan.

Sa mensahe sa LGU, gipasiugda nga ang maong programa dili lamang paghatag og materyal nga suporta, kundili usa ka lakang sa pagpalig-on sa kapasidad sa mga benepisyaryo aron mahimong produktibo ug masaligan nga mga miyembro sa komunidad.

Ang turn-over nagpakita sa padayon nga paningkamot sa LGU Kapalong sa paghatag og inklusibo ug sustenableng mga programa nga nagpalig-on sa panginabuhian ug naghatag og paglaum sa katawhan, ilabi na sa mga kabus ug vulnerable nga sektor sa komunidad.

𝐎𝐚𝐭𝐡𝐭𝐚𝐤𝐢𝐧𝐠 𝐂𝐞𝐫𝐞𝐦𝐨𝐧𝐲 𝐬𝐚 𝐒𝐞𝐦𝐨𝐧𝐠 𝐅𝐚𝐫𝐦𝐞𝐫𝐬 𝐋𝐢𝐯𝐞𝐥𝐢𝐡𝐨𝐨𝐝 𝐀𝐬𝐬𝐨𝐜𝐢𝐚𝐭𝐢𝐨𝐧 (𝐒𝐄𝐅𝐀𝐋𝐈𝐀) 𝐆𝐢𝐩𝐚𝐡𝐢𝐠𝐚𝐲𝐨𝐧 𝐬𝐚 𝐁𝐫𝐠𝐲. 𝐒𝐞𝐦𝐨𝐧𝐠

Malampusong gipahigayon ang oathtaking ceremony sa mga opisyal sa Semong Farmers Livelihood Association (SEFALIA) , adlaw’ng Huwebes, Enero 26, 2026 sa Barangay Hall sa Barangay Semong, Kapalong. Ang panumpa sa katungdanan opisyal nga gipangulohan ni Mayor Edgardo L. Timbol.

Ang maong kalihokan nagtimaan sa pormal nga pagsugod sa responsibilidad sa mga napiling opisyal sa SEFALIA nga magdumala ug magpalambo sa mga programa ug inisyatiba alang sa kaayohan sa mga mag-uuma sa Barangay Semong.

Sa iyang mensahe, gipasiugda ni Mayor Timbol ang importansya sa pag-organisa sa mga mag-uuma aron mas mapalig-on ang ilang sektor, mapalambo ang produksyon, ug mapadali ang pag-access sa mga programa ug suporta gikan sa lokal nga panggamhanan ug uban pang ahensya sa gobyerno. Gi-awhag usab niya ang mga opisyal ug miyembro sa asosasyon nga magpabiling matinud-anon, responsable, ug magtinabangay alang sa kalamboan sa ilang komunidad.

Ang pagtukod ug pagpalig-on sa mga farmers’ association sama sa SEFALIA kabahin sa padayon nga paningkamot sa LGU Kapalong sa paghatag og suporta sa sektor sa agrikultura, nga usa sa mga prayoridad sa administrasyon.

Ang maong oathtaking ceremony nagpakita sa panaghiusa sa barangay ug sa lokal nga panggamhanan sa pagpalambo sa panginabuhian sa mga mag-uuma ug sa pagpalig-on sa lokal ekonomiya sa komunidad ug sa tibuok lungsod sa Kapalong.

𝐋𝐆𝐔 𝐊𝐚𝐩𝐚𝐥𝐨𝐧𝐠 𝐮𝐠 𝐍𝐈𝐀 𝐃𝐚𝐯𝐚𝐨 𝐝𝐞𝐥 𝐍𝐨𝐫𝐭𝐞 𝐍𝐚𝐠𝐩𝐚𝐡𝐢𝐠𝐚𝐲𝐨𝐧 𝐨𝐠 𝐌𝐞𝐞𝐭𝐢𝐧𝐠 𝐮𝐠 𝐒𝐢𝐭𝐞 𝐈𝐧𝐬𝐩𝐞𝐜𝐭𝐢𝐨𝐧 𝐊𝐚𝐛𝐚𝐡𝐢𝐧 𝐬𝐚 𝐍𝐈𝐀 𝐂𝐚𝐧𝐚𝐥 𝐏𝐫𝐨𝐣𝐞𝐜𝐭 𝐬𝐚 𝐁𝐚𝐫𝐚𝐧𝐠𝐚𝐲 𝐌𝐚𝐧𝐢𝐤𝐢

Nagpahigayon og meeting si Mayor Edgardo L. Timbol uban ang mga opisyal sa National Irrigation Administration (NIA) Davao del Norte, adlaw’ng Huwebes, Pebrero 24, 2026, alas 1:00 sa hapon sa Mayor’s Office, aron hisgutan ang mga isyu may kalabutan sa proposed conversion ug sa NIA Canal Project nga nakaapekto sa Relocation Area sa Barangay Maniki.

Ang maong panagtigum nagtutok sa mga kabalaka bahin sa irrigated areas sulod sa relocation site ug sa posibleng epekto niini sa kaluwasan sa komunidad ug sa hapsay nga pagpadayon sa mga plano sa kalamboan sa lokal nga panggamhanan.

Mitambong gikan sa NIA sila Engr. Nelson Sahot, Acting Division Manager; Engr. Anne Jaron; ug Zerlo Jun Mangubat. Gikan sa LGU Kapalong usab sa maong tigum sila EnP. Gemma Christie L. Vicada sa Municipal Planning and Development Office (MPDO), Erwin Duque sa MO-CAO, ug mga representante gikan sa Municipal Engineering Office.

Sumala sa sulat nga gipadala ni Mayor Timbol sa NIA, ang maong isyu una nang nahisgutan sa personal nga meeting sa opisina sa NIA sa Carmen, ug padayon nga ginamonitor sa lokal nga panggamhanan. Ang kabalaka naglangkob sa isyu sa premature conversion ug sa kahimtangan sa NIA canal nga nahimutang sulod sa Relocation Area sa Barangay Maniki.

Tungod niini, opisyal nga mihangyo ang LGU- Kapalong nga magpahigayon ang technical team sa NIA og site inspection aron ma-assess ang aktwal nga kondisyon sa kanal ug ma-evaluate ang mga natala nga isyu sa maong lugar. Tumong niini ang pagbaton og klaro ug teknikal nga basehanan alang sa angay nga mga lakang nga pagahimoon.

Human sa diskusyon, midiretso dayon ang mga opisyal sa NIA sa pag-conduct og actual site inspection sa maong lugar uban si EnP. Gemma Cristie L. Vicada, Erwin Duque, ug mga representante gikan sa Municipal Engineering Office aron personal nga masuta ang kahimtangan sa NIA canal ug ang epekto niini sa relocation area.

Gipasiugda ni Mayor Timbol nga ang LGU seryoso sa pagmonitor sa maong concern tungod sa posibleng epekto niini sa komunidad ug sa maayong pagpadayon sa mga programa sa kalamboan sa relocation area. Ang lokal nga panggamhanan nagpaabot sa paborableng tubag ug teknikal nga evaluation sa NIA aron masiguro nga ang mga lakang nga pagahimoon makaprotekta sa interes sa katawhan.

Ang maong kalihokan nagpakita sa padayon nga koordinasyon tali sa LGU Kapalong ug NIA sa pagsiguro nga ang mga proyekto sa irigasyon ug development initiatives matuman nga adunay konsiderasyon sa kaayohan ug kaluwasan sa komunidad.

𝟖𝐭𝐡 𝐑𝐞𝐠𝐮𝐥𝐚𝐫 𝐒𝐞𝐬𝐬𝐢𝐨𝐧 𝐬𝐚 𝐒𝐚𝐧𝐠𝐠𝐮𝐧𝐢𝐚𝐧𝐠 𝐁𝐚𝐲𝐚𝐧 𝐬𝐚 𝐊𝐚𝐩𝐚𝐥𝐨𝐧𝐠 𝐍𝐚𝐠𝐩𝐚𝐥𝐢𝐠-𝐨𝐧 𝐬𝐚 𝐁𝐮𝐝𝐠𝐞𝐭 𝐑𝐞𝐯𝐢𝐞𝐰, 𝐃𝐞𝐯𝐞𝐥𝐨𝐩𝐦𝐞𝐧𝐭 𝐏𝐥𝐚𝐧𝐬 𝐮𝐠 𝐃𝐮𝐠𝐚𝐧𝐠 𝐒𝐞𝐫𝐛𝐢𝐬𝐲𝐨 𝐬𝐚 𝐊𝐚𝐭𝐚𝐰𝐡𝐚𝐧

Gipahigayon karong adlawa, Pebrero 25, 2026, alas 9:00 sa buntag, ang 8th Regular Session sa Sangguniang Bayan sa lungsod sa Kapalong, ubos sa pagpangulo ni Vice Mayor Kim P. Quesada.

Ang 8th Regular Session gi-preside ni Hon. Edgardo “Bogs” Timbol, Jr., uban sa presensya nila Hon. Baltazar B. Solis, Jr. II, Hon. Ludo Vhan M. Lagang, Hon. Gemma Q. Rarangol, Hon. Jonathan Pineda, Hon. Edilberto Febria, Hon. Ayette Timbol, Hon. Jake A. Cabilogan, ug Hon. Nickle Mones.

Ang sesyon nagtutok sa pagreview ug pag-refer sa nagkalain-laing proposed resolutions ug opisyal nga komunikasyon nga may kalabutan sa development planning, pag-apruba sa pondo, ug pagpalig-on sa mga serbisyo alang sa katawhan sa Kapalong.

Lakip sa mga gipanghisgutan ang pag-apruba sa Annual Investment Plan (AIP) alang sa Calendar Year 2026 sa Barangay Gupitan nga gisumite ni Hon. Gemma Q. Rarangol ug gi-refer sa komitiba alang sa mas lawom nga pag-evaluate.

Gisumite usab ni Hon. Romel J. Belaua ang resolusyon sa pag-apruba sa General Fund Annual Budget 2026 sa Barangay Florida nga nagkantidad og ₱7,880,901.00, nga gi-refer sa Committee on Finance, Budget and Appropriation.

Samtang, gisumite ni Hon. Jake A. Cabilogan ang resolusyon sa pag-apruba sa General Fund Annual Budget 2026 sa Sangguniang Kabataan sa Barangay Florida nga nagkantidad og ₱788,090.00, nga gi-refer sa Committee on Finance, Budget and Appropriations isip lead committee ug sa Committee on Youth and Sports Development.

Gisumite usab ni Hon. Baltazar B. Solis, Jr. II ang resolusyon sa pag-apruba sa General Fund Annual Budget 2026 sa Barangay Mamacao nga nagkantidad og ₱5,997,753.00, nga gi-refer sa Committee on Finance, Budget and Appropriation.

Ang tanang mga resolusyon girekomenda sa tagsa-tagsa ka komitiba alang sa angay nga aksyon.

Gihisgutan usab sa Konseho ang mga endorsement letters may kalabutan sa proposed Memorandum of Agreement (MOA) alang sa pag-establisar og Automated Weather Station sa mga rice-producing areas sa lungsod aron mapalig-on ang pagmonitor sa kahimtang sa panahon ug matabangan ang sektor sa agrikultura. Gihisgutan usab ang proposed MOA alang sa pag-operate sa NBI Clearance Center sa Kapalong aron mapaduol ang serbisyo sa katawhan.

Ubos sa Supplemental Order of Business, miagi sa diskusyon sa Konseho ang hangyo alang sa ₱10 milyon nga pondo para sa rehabilitasyon sa mga barangay roads sa Sua-on, ingon man ang pagdawat sa ₱3 milyon nga Special Financial Assistance (SFA) gikan sa Office of the President nga gamiton alang sa mga prayoridad nga programa sa lokal nga panggamhanan.

Ang maong session nagpakita sa padayon nga paningkamot sa Sangguniang Bayan sa Kapalong sa pagpatuman sa responsableng pagdumala, maayong pagplano sa pondo, ug paghatag og epektibong serbisyo alang sa tanang Kapalongian.