19/01/2026
پاکستان پیپلز پارٹی کے سینئر رہنما سابق ڈپٹی جنرل سیکرٹری میر ثناءاللہ جتک نے وزیراعلیٰ بلوچستان میر سرفراز بگٹی کو زبردست خراجِ تحسین پیش کرتے ہوئے کہا ہے کہ بلوچستان کی تاریخ میں پہلی مرتبہ ان کی مدبر اور باصلاحیت قیادت میں محکمہ خزانہ کی 111 سرکاری آسامیوں پر مکمل شفافیت، غیر جانبداری اور میرٹ کی بنیاد پر بھرتی ایک انقلابی اور قابلِ تقلید اقدام ہے۔
انہوں نے کہا کہ اس تاریخی اور شفاف عمل کے نتیجے میں صوبے کے باصلاحیت نوجوانوں کو باعزت روزگار کے مساوی مواقع فراہم ہوئے ہیں، جس سے نہ صرف نوجوانوں کے مستقبل کو نئی سمت ملی ہے بلکہ عوام کا ریاستی اداروں اور سرکاری نظام پر اعتماد بھی ایک بار پھر مضبوط ہوا ہے۔
میر ثناءاللہ جتک نے مزید کہا کہ ایک ہی دن میں تحریری امتحان، نتائج کے اعلان اور تقرریوں کا منظم، تیز اور شفاف عمل بلوچستان کی انتظامی تاریخ میں ایک روشن مثال ہے، جو اس امر کا واضح ثبوت ہے کہ پاکستان پیپلز پارٹی کی حکومت صرف دعووں پر نہیں بلکہ عملی کارکردگی، شفاف طرزِ حکمرانی اور حقیقی میرٹ پر یقین رکھتی ہے۔
انہوں نے کہا کہ وزیراعلیٰ بلوچستان میر سرفراز بگٹی کی اصلاحاتی، عوام دوست اور نوجوانوں کو بااختیار بنانے والی پالیسیوں نے صوبے کو ترقی، انصاف اور پائیدار خوشحالی کے راستے پر گامزن کر دیا ہے، جو آنے والے وقت میں بلوچستان کی تقدیر بدلنے کا پیش خیمہ ثابت ہوں گی۔ میر ثناءاللہ جتک نے اس عزم کا اظہار کیا کہ پاکستان پیپلز پارٹی وزیراعلیٰ میر سرفراز بگٹی کی قیادت میں شروع کی گئی ان تاریخی اصلاحات کو مزید وسعت دینے، مضبوط بنانے اور عوامی توقعات پر پورا اترنے کے لیے ہر سطح پر ان کے شانہ بشانہ کھڑی رہے گی اور صوبے کی تعمیر و ترقی کا یہ سفر بھرپور انداز میں جاری رکھے گی۔
30/12/2025